Kum 2015-2020 chhungin mi 19,220 thawnkir

Kum 2015-2020 chhungin ILP nei lova Mizoram-a awm mi 19,220 chu thawnkir an ni tawh.

Assembly Session neih mekah eptu Member, Andrew H. Thangliana ziaka zawhna chhanga he thu hi sawiin Home Minister, Lalchamliana chuan kum 2015 atanga kumin (2020) January thleng khan ILP 5,53,321 pekchhuah (issue) a nih thu tarlangin, hemi hun chhung vek hian ILP nung (valid) lo 20,765 chhuichhuaka man a nih thu leh 2015-2020 chhung hian mi 19,220 thawnkir an nih thu a sawi.

Home Minister chuan, Mizoram sawrkar-in ILP checkgate hrang hrangte thuamthat a tum mek tih sawiin, “A theih chin chinah online ILP system kalpui vek a nih theih nan hmanraw tulte lei tum mek a ni,” a ti.

Eptu Member, Andrew H. Thangliana'n Vairengte daia Assam sawrkarin Forest Department In a sak chungchang chawlhsan turin emaw, luah lo turin emaw hmalakna a awm em? tia a zawhna chu Home Minister, Lalchamliana chuan chhangin, Assam sawrkarin Forest Department In (building) a sa chu 'status quo' bawhchhiatna a nih avangin an hmalakna titawp tura Assam sawrkar hnena thurawn pe tura Ministry of Home Affairs hnena thlen a nih thu a sawi a. Zophai-a Mosque sak mek chung-changa zawhna pawh chhangin Home Minister chuan, Mizoram sawrkarin ramri buai chungchang zirchiang tura a din, Core Committee-in a rel angin Zophai-a Masjid satu, Kachurtol Masjid Committee te chu an hmalakna titawp tura hriattir an nih thu a sawi.

Hei bakah hian September ni 9, 2019 khan Kolasib DFO-in Kachurtol Masjid Committee hnenah an hnathawh chawlhsan turin lehkha a thawn tih Home Minister chuan a sawi a, October ni 22, 2019 khan Chief Secretary-in Assam sawrkar hnenah lehkha thawnin, Masjid sak chu 'status quo' bawhchhiatna a nih avangin, hna chawlhsan tura hmalakpui turin a ngen tih a sawi bawk.