Bamboo Processing Industry din tumna awmin Mau chin tur supply tura inremna ziahpui an la awmlo

Horticulture Department changtu Chief Minister, Zoramthanga chuan Bamboo Processing Industry din tumna a awm thu Assembly House hrilhin, Mizoram-a chin tur Brandisi Bamboo emaw Bamboo Species dang pawh supply turin Mizoram sawrkarin Company emaw, mimal emaw inremna ziahpui a la nei lo tih a sawi.

Mizoram Legislative Assembly thutkhawm neih mek chu nimin khan chhunzawm leh niin zawhna leh chhanna hunah eptu Member, C. Lalsawivunga zawhna chhanga he thu hi sawiin Horticulture Department changtu Chief Minister, Zoramthanga chuan Bamboo Processing Industry din tumna a awm thu a sawi a, Bamboo atanga thil siamchhuah engpawh a hralhna tur Marketing mumal tak tihfel a la ni lo tih sawiin, Mizoram a chin tur Brandisi Bamboo emaw, Bamboo Species dang pawh supply turin Mizoram sawrkarin company emaw mimal emaw inremna ziahpui a la nei lo, a ti a. Zawh belhna chhangin Chief Minister chuan Raw chi emaw, thlai tiak emaw Department Supply tir tum a ni lo tih pawh sawiin, “Thlai chi supply hi Department-in a tih vak chi ah kan ngai lova, Horticulture Department hian Brandisi chi emaw, tiak emaw dawn an la nei lo, tih tir an ni bawk lo,” a ti a. Mau chi supply tu tur tihfel a la awm lo tih pawh sawiin, Tender pawh a la awm lo tih a sawi a. “Bamboo Processing Industry chu Private veka din tir kan tum,” a ti bawk.

Chief Minister chuan Raw chinpunna tura a chi siamna, Tissue Culture chu a thiam inti nazawng hnen atangin lak an tum lo tih pawh sawiin, thil tihsual an hlauh avangin Department in uluk taka a enfiah a, tlaka an ngaih chinte chauh an kalpui dawn tih a sawi a, tun dinhmunah Brandisii leh Latiforus chu Mizoram-a chin ngama an ngaih a nih thu sawiin, hetihlai hian Latiforus chu lian thamin an la ti hman lova, Laboratory lam pawh an la inpeih hman lo a ni, a ti a, Brandisii chi pawh duhkhawp an la pek theih loh thu a sawi bawk.

Autonomous District Council pathum ah pawh Mau chinpunna, Bamboo Production Plantation chu kalpui tum a nih thu Chief Minister chuan sawiin, Mizoram pumah a remchan anga kalpui tum a nih thu a sawi a. Hetihlai hian District tan bika pawisa dah ala awm loh thu pawh sawiin, mi tlemte hnenah chauh sem ala nih thu a sawi bawk.