Coronavirus vangin Mizoram leh ram dang inrina, International border te chu khar rih a ni dawn

Khawvel ram hrang hranga natna hri, Coronavirus leng mek avangin Mizoram leh ram dang inrina, International border te chu khar rih a ni dawn.
Khawvel ram hrang hranga natna hri Coronavirus leng mek leh he virus in natna a thlen, COVID-19 laka invenna kawnga hmalak a lo inpuahchah dan ngaihtuahin nimin chawhnu khan Chief Minister, Zoramthanga hovin Chief Minister Conference Hall-ah Cabinet Minister te, Chief Secretary leh sawrkara thawktu pawimawh te thukhawmin he hri leng mek laka Mizoram a him theih dan tur an sawiho a. He Meeting hian Mizoram leh ramdang inrina, International Border te chu khar rih nise tiin, State dang pathum te nen a inrina hmun hrang hrang zingah Entry Point siamin, chungte chu Assam nen inrina Bairabi leh Vairengte; Manipur nen inrina Khawkawn leh Tripura nen inrina Kanhmun a ni a. Heng Entry Point-ah hian enfiahna, Screening ukul taka kalpui a ni ang a. Heng hmunah chauh hian State chhung luh phal a ni anga. Hei bakah hian Chief Secretary kaihhruaina hnuaia Task Force din ni se tiin, Department hrang hrangte nen a tanghovin COVID-19 laka invenna kawnga hmalakna te chu State Level-ah a bawhzui dawn a ni.
Khawvel hmun dangah hri leng hi a tam avangin India khua leh tui nilo, foreigner te chu Mizoram an lo luh phal rihloh mai ni se tiin Meeting chuan a rel a, Foreigner bakah State dang atanga lolut turte pawh chakkhai phur turte leh ei leh bar atana pawimawh te chu uluk taka enfiah an nih hnuah ILP pek an ni ang a. Chutiang mi nilo chu ILP pek rihlo tur niin, Labourer tur pawh Mizoram-a awm mek an nih loh chuan mi thar lo lut tur chu ILP pek rihloh ni se tih a ni.
He Meeting hian mitin te chu loh theihloh thilah lo chuan fimkhur thu hla ah puipunna a tel tamloh nise tiin, Mizoram pawn-a zinchhuah pawh theihna chin chinah tih tam loh nise tiin mipui a chah bawk a. COVID-19 chungchangah hian thuthang diklo a tam avangin Principal Director, Health Services atanga chhuak a nih loh chuan Mizoram-a he natna chungchang thuthang dang reng reng chu thutling-ah pawm tlak a nih loh thu sawi a ni bawk. Tun dinhmunah Mizoram-ah hian COVID-19 hi case hmuh a la nilo a. Ramdang atanga lo zin haw dahhran a enthlak mi 67 awm tawhin, an zinga 6 chu natna an neih loh avangin quarantine atan hian an chhuak tawh a ni.

Comments

Chhiar Hlawhte