Mizoram DGP in Serchhip Police te tlawhin tha taka an hna an thawh theihna turin a fuih

Mizoram Director General of Police (DGP), SBK. Singh IPS chuan nimin khan Serchhip-a Police hmun te tlawhin Serchhip SP Conference Hall-ah Police Sammelan hun a hmanpui a, Police te chu tha taka an hna an thawh theih nan an taksa vawng uluk turin a chah.
Serchhip rawn tlawhtu Mizoram DGP hi Serchhip SP, R. Sathiyasundaram IPS leh a thawhpui ten SP Office-ah lo dawngsawngin Serchhip SP Confererence Hall-a Police Sammelan-ah hian DGP chuan Mizoram Police-ah thawktu indaihlohna nasa tak a awm thu sawiin, hemi sukiang tur hian Chief Minister hova hmalak a nih thu leh Mizoram Police-a sanction post 12,000 awmah 9,000 chiah hnawh khah a nih thu a sawi a, thawktu indaihlohna su kiang tur hian kumin chhunga thawktu 700 lak belh tum a nih thu a sawi a. Quarters leh lirtheia harsatna awm mek chinfel nan Ministry of Home Affairs-ah cheng vbc. 367 vel dil niin, hmuh theih ngei beisei a nih thu pawh a sawi a. Mizoram Police-ah a tha zawng leh hmasawn zawnga thil inthlakthlengtir tuma tan an lak mek thu sawiin, Police te chu ram tana an theihna zawng zawng nena hna thawk turin an hriselna uluk a, insawizawi uar a, Zu leh ruihhlo dang laka inthiarfihlim turin a chah bawk.
He hun kaihruaitu Serchhip SP, R. Sathiyasundaram IPS chuan Serchhip District-a Police dinhmun tlangpui he hunah hian tarlangin, Serchhip District SP Office chu kum 1998-a Serchhip District a pian atangin mimal In luah hawh-a bul tanin kum 2012-ah tuna an Office chu an luah thu a sawi a. Tunah hian Sanction Post 153 awmah thawktu 125 awmin Post ruak 33 a awm mek thu a sawi a. Serchhip District-ah hian Police Sub-Division 1 (Serchhip), Police Station 3 (Serchhip, Thenzawl leh North Vanlaiphai), Police Out-Post (Chhingchhip) leh Beat Post (Serchhip Bazar) pakhat ve ve awmin District Special Branch (DSB) leh Traffic Branch te an awm thu a sawi bawk.
He hunah hian Serchhip-a thawk Police te chuan kawng hrang hranga harsatna an tawh leh an mamawh te Mizoram DGP hnenah hian lo thlenin heng an thil thlen te hi a theih anga ngaih-tuahpui a nih tur thu DGP chuan a sawi bawk.
Serchhip tlawhtu Mizoram DGP, SBK. Singh hi a nupui, Sishi Singh chuan rawn tawi-awmin DGP nupui hian nimin vek khan Mizoram Police Wives Welfare Association (MPWWA) Serchhip Unit hruaitute chu Serchhip Police Recreation Hall-ah a kawm bawk a, he hunah hian Police nupuite chu an pasal ten ram leh hnam tana an hnathawh te hriatpuia tha taka an hna chu an thawh theih nana kawng hrang hranga tawiawm tlat turin a fuih bawk a ni.

Comments

Chhiar Hlawhte