Village Level Development Programme kalpui dan tur thlir

Village Level Development Programme kalpuina tura State Level Coordination Committee chu nimin khan Aizawl-ah thukhawmin Pilot Project atana thlan khaw 6-a hmalak dan tur hrang hrang an sawiho.

Village Level Development Programme hi Planning & Programme Implementation Department duan niin Pilot Project atan Mizoram District 6-ah khaw pakhat zel thlan an ni a, heng khuate hi Aizawl District-ah Sailam; Lunglei District-ah Sekhum; Champhai District-ah Chawngtlai; Kolasib District-ah Lungdai; Serchhip District-ah Leng leh Mamit District-ah Ailawng khua te a ni.

Village Level Development Plan in a tum ber chu hmasawnna mamawh te a khaw mipuite nen inrawnkhawma, an mamawh te tihpuitlin kawnga Development Plan duan pui te, khaw entawntlak ni tura a khaw mipuite zirtir leh buatsaih te, entrepreneurship hmanga a khaw mipuiten eizawnna ngelnget an neih thei nan kaihhruai leh zirtir te leh central leh state sawrkar scheme te fel taka hmasawnna a awm thei nana khaikhawm te a ni.

Nimin-a hemi chungchang ngaihtuaha thutkhawm neih hi Planning & Programme Implementation Department-a Principal Adviser-cum-Additional Secretary, Lalrikhuma Sailo chuan kaihruaiin mithiam hrang hrang ten ruahmanna siam dan tur leh hmalak dan turte an sawi a. Coordination Committee a tel Line Department hrang hrang aiawhte chu Village Level Development Programme hnuaia an mawhphurhna te leh an chanvo te leh Village Development Plan duanna kawngah an tih tur te hrilhfiah an ni a. Ruahman ang chuan Line Department hrang hrang ten khaw thlan bika an scheme hmanga hna thawh dan tur ruahmanna chu SIRD&PR ah an thehlut anga, a rang thei ang berin Awareness neih zui a ni anga, hemi hnu hian hmalak zui a ni dawn a ni.