Serchhip-a Para-Gliding intihsiakna neihna tur MYC Chairman in a hmunah a tlawh

Mizoram Youth Commission (MYC) Chairman, Dr. Vanlaltanpuia MLA chuan tun thla ni 13 atanga International Paragliding Accuracy Championship-2020 neihna tur hmun, Serchhip Bawngchawm tlang chu nimin khan a tlawh a. He intihsiakna neih tur atan hian inbuatsaihna zaa 95 vel peihfel a ni tawh.

MYC Chairman hian Serchhip Bawngchawm tlang-a Paragliding Thlawh chhuahna (take off) hmun hi nimin chawhnu dar 2:00 khan tlawhin, amah lo dawngsawngtu Mizoram Aero-Sport Association President, C.Lalhminghlua leh a thawhpui te hnenah, hetianga thalai hmasawnna tur leh khualzin hipna tur ni bawk helai hmuna buatsaih a ni chu lawmawm a tih thu sawiin, MYC in tih theih a neih apiang ti tura a inhuam thu a sawi a. MYC hmalak mekna lian tham pahnih, Lunglei-a Hot Air Baloon chuan theihna hmun siam tum thu leh IAS Coaching Centre Delhi-a din tum a nih thu te pawh a sawi bawk. MYC Chairman hian hian Paragliding Take Off hmun chhaka awm Bawngchawm khaw hmun hlui pawh a tlawh nghal bawk.

International Paragliding Accuracy Championship-2020 neih tur atan hian inbuatsaihna ngawrh taka kalpui mek niin tunah hian thil tul zingah zaa 95 vel chu zawhfel a ni tawh a. Bawngchawm tlang atanga thlawk te tumna tur hmun, Landing point atan mi 2 leilet chu leiin suihfin a laihzawl mek a ni bawk a. Hei pawh hi hun reilote ah zawhfel theih tawh tura beisei a ni.

Ruahman ang chuan he Championship hi tun thla ni 12 zan-ah Serchhip Tourist Lodge tual-ah Home Minister, Lalchamliana'n a hawng anga, Feb. 16-ah Zawlpui-a Landing-ah lawm-man semna chu Chief Minister, Zoramthanga leh Tourism Minister, Robert Romawia Royte ni bawk hovin neih tum a ni a. He championship a hmuna en tur hian mitin sawm an ni.

Khawvel huapa Paragliding intihsiak neih turah hian South Korea, India, Kazakhstan, Afghanistan leh Nepal atang te in tel tura hming pe an awm tawh a. Macedonia leh Slovenia atangin endiktu te an rawn kal dawn bawk a. Tunah hian rampawn atanga he intihsiakna a tel tur hi rawn kal la awm lo mah se India ram atanga tel tur ten man chawiin a duh apiang tana chuan theihna tur an kalpui mek a ni.