Saza kaptute Police ten an chhuichhuak nghal

Tunhnaia Social Media hrang hranga Mizo-ram State Animal, Saza kap lai video tihdarh chungchangah Association for Environmental Preservation (ASEP) chuan nimin khan FIR thehlutin nimin vek khan Saza kaptu nia hriat te hi chhuichhuah nghal an ni.

ASEP hruaitute chuan tunhnaia Mizoram State Animal, Saza kap lai Video Social Media hrang hrang- WhatsApp leh Facebook vela rawn phochhuah chu thalo an tiin an dem tak zet tih an sawi a, hetianga dan pawisa lo leh nunrawng, State Animal hial kaptute hi man chhuah ngei nise a duh tak zet tih sawiin, Police lam leh Environment, Forests & Climate Change Department lam pawhin theihtawp a chhuah zui nghal chu lawmawm an tih thu leh thil sual titu hi man chhuak ngei tur pawhin an beisei tlat tih an sawi a ni.

Hetianga ASEP in FIR an thehluh hnu nimin vek khan Saza kaptu leh he Video theh-darhtu nia hriat te hi Police te chuan chhui-chhuakin he Saza kaphlumtu nia hriat hi PC. Zomuankima S/o Biakkunga, East Phulpui nia hriat niin a thehdarhtu hi Lungtiawia S/o Chhuanliana, E. Phulpui nia hriat a ni bawk a. Kulikawn Police te chu nimin khan heng mite man tur hian an thawkchhuak nghal a ni.

ASEP hruaitute chuan heng Saza kaptute hi manchhuah a nih chuan danin a sawi ang ngei hremna lekkawh ngei pawh a phut tlat tih an sawi a, hetiang Dan bawhchhia te Hremna hi The Wildlife (Protection) Act 1972 ang chuan kum 3 aia tlem lo lung in tan, kum 7 thleng pawhsei theih leh Rs. 10,000/- aia tlem lo chawi-tir ngei ngei tur a ni tih an sawi a. Tun ang din-hmunah pawh hetianga thil ti duh an la awm chu lungchhiatthlak an tih thu leh, tun hnu-ah hetiang thil hi thleng leh tawh lo turin an duh takzet tih an sawi bawk.