Latest News

Oil khuahkhirhna siam

Tunhnaia ramri-a buaina thleng avanga POL Supply khaihlak thei dinhmuna kan din tawh avangin Serchhip District Bawrhsap chuan Serchhip District chhunga Filling Station ten POL pekchhuah dan khuahkhirhna a siam a. Hei hi Supply Department Director in Order alo siam tawh behchhana siam niin he ruahmanna aia tam hian POL hi pekchhuah tur ni lovin Bur-a dawh phal a ni lo bawk. Hei bakah hian Filling Station neitute chuan Petrol hi litre 2500 leh Diesel hi litre 4000 a awmin DCSO hnenah hriattir tur a ni bawk ang.

Thelret hnai dan leh sawngbawl dan zir dawn

Thelret hnai dan leh sawngbawl dan zir tura Thelret chingtu zinga mi 50 thlanchhuah te chuan Exodus Rubber Society Training Centre, Khamrang-ah chawlhkar khat chhung training an nei dawn a, heng mite hi Land Resources, Soil & Water Conservation Department Minister, R. Lalzirliana chuan Aizawl atangin a vailiam.
Aizawl-a LRS&WC Office-a he training-a tel turte puala inkhawm tawi neih ah Minister, R. Lalzirliana chuan Mizoram-a Thelret chingtu zinga tam takin hunrei tak chhung tha leh sum senga an nghah puitlin tak, Thelret Kung tam tham tak hnai theihin a lo puitling ta chu thil lawmawm tak a ni tih a sawi a. Thelret chingtute thawh-rimna chuan Mizoram tan sum leh paiah hmasawnna a thlen dawn bakah mi tam tak tak eizawnna pawh a siam chho ngei dawn bawk a ni, a ti a. Kum hmasa lamah Guwahati lamah Batch 2 tirh an lo ni tawh naiin Mizo tawng ngeia kuthna-thawktu ten thiam thil an zirchhuah tha tih zawk a nih avangin kumin atang chuan Mizoram chhungah Thelret chingtute chu training pek an ni tawh zawk dawn tih a sawi bawk.
Report a tarlan dan chuan tun dinhmun ah Mizoram-ah Thelret huan nei mi 4207 awm mek nia ngaih a ni a. Heng Thelret chingtute zinga mi 1300 vel chu Mizoram Rubber Planters’ Association(MIRPA) member an ni a. MIRPA chhut dan chuan tunah hian Thelret kung nuai 15 bawr vel a ding mek a; heng zinga kung nuai 2 chuang zet chu hnai rual an ni tawh a ni.

Comments

Chhiar Hlawhte