DoNER leh NEC sum hmanga hnathawh thlirlet

Ministry of Development of North Eastern Region (DONER) Secretary, Dr. Inder Jit Singh hovin niminpiah tlai khan Aijal Club-ah DONER Ministry leh NEC sum kaltlanga hmasawnna hna – Project leh Scheme hrang hrang thawh mek te thlirletna ‘Review Meeting’ neih a ni.

Aijal Club Conference Hall-a he Review Meeting-ah hian DoNER Secretary, Dr. Inder Jit Singh chuan Mizoram-ah Project te endik emaw, thil tih dan sawisel emaw tura lo kal anih lo thu sawiin, Mizoram in chak leh zawkin engtin nge hma a sawn theih ang tih te, hmasawnna tehfung hrang hrangah engtin nge dinhmun sang zawkah Mizoram leh Mizo mipuite an in hlankai theih ang tih te leh a hmun a lo kala thil awm dan te sawiho a duh vanga lo zin a nih thu te a sawi a. Hmasawnna atan sum chu a tlem lova, Ministry tinin Hmarchhak hmasawnna atana an Budget atanga za zela 10 an dah hran chu Ministry tam takin an hmang bang nasa tih tarlangin, chawhrualin he sum tlingkhawm atang hian za zela 50 awr chauh hman anih thu a sawi a. He sum hi hlawk takin Hmarchhak state ten an hman theih nan State Sawrkar tih tur leh kal dan tur te a tarlang bawk.

Sum hman ban a tam thu ah State Sawrkar te chauh an ni bik lo tih sawiin DoNER Secretary chuan, Ministry lam te hi kan inenfiah a ngai ve tho a ni tiin, chutih rualin NEC project bikah NEC in a vilzuina 'monitoring' lamah tan an lak a ngaih thu a sawi a. Tunhnaia Ministry tinin 10 percent (10%) an hman dan dinhmun dil a, Hmarchhak state tin Chief Secretary hnenah a thawn thu sawiin, hei hi sawrkar kum tharah proposal thar tam zawk a hrinchhuah a beisei tih a sawi bawk.

He hunah hian Mizoram Chief Secretary, Lalnunmawia Chuaungo pawhin thuhma sawiin Mizoram Sawkar chuan hmasawnna leh ruahmanna te kalpui kawngah theihtawp a chhuah tih a sawi a, he inkawmhona hian Mizoram hmasawnna atan rah tha leh thil thar a hrinchhuah ngei a beisei tih a sawi bawk.

He Meeting ah hian Planning & Programme Implemantation Secretary Dr. C. Vanlalramsanga chuan Non Lapsable Central Pool of Resource (NLCPR), North Eastern Council (NEC), North East Special Infrastructure Development Scheme (NESIDS), National Rural Livelihoods Mission (NRLM), North Eastern Region Community Resource Management Project (NERCOMP), North East Rural Livelihood Project (NERLP) sum leh ruahmanna kaltlanga Line Department ten hmasawnna hna hrang hrang an thawh mek te dinhmun leh henga harsatna hrang hrang an tawh te Power Point presentation hmangin a tarlang a. Presentation ah harsatna tarlan te sawiho niin a sutkian nan DoNER Secretary chuan rawtna hrang hrang a siam nghal a ni.