Sialkal Range Development Council Office thar Chief Minister in Mimbung-ah a hawng

Chief Minister Zoramthanga chuan nimin khan Mimbung-ah cheng nuai 45 senga sak, Sialkal Range Development Council (SRDC) Office thar chu a hawng a. SRDC chu council puitling a hlan a nih theih nan thawihtawpa sawrkarin hma a lak pui tur thu a sawi bawk.

Lengteng leh Champhai North Assembly Constituency a khaw paruk - Mimbung, Hrianghmun, Teikhang, Kawlbem, Selam leh Vaikhaw-tlang te huamtu Sialkal Range Development Council hi February ni 24, 2012 khan Development Board-a din niin Council (SRDC)-ah September ni 24, 2013 khan thlak a ni a. Nimin-a Office hawnna hunah hian Chief Minister chuan Sialkal Range Development Council Office hawn a ni chu lawmawm a tih thu sawiin, a building sak pawh a pawisa hman nen inmil a tha nia a hriat thu a sawi a. Nakin zelah pawh Council Area chhunga hnathawh tur dang hrang hrang la awmte pawh pawisa milin a that zui zel a beiseiawm tih a sawi a, chutianga thawk zel tur pawhin kalkhawmte a chah a ni. Chief Minister chuan SRDC chu Council puitling a hlan a nih theih nan thawihtawpa sawrkarin hma a lak pui tur thu sawiin, Buh a intodelh theih nan a leilet siamna tura hmalakpui tura an thlen pawh project siam tura chah in, sawrkarin lo bawhzuiin hma a lo lakpui zui tur thu a sawi a. Manipur nen a inkalpawhna tur Lei dawh tha zawk siama hmalak a nih tur thu pawh sawiin, Mizoram tana sawrkar in hma a lakna hrang hrangah mipui ten thawhhona tha kan neih a, mahni zawn theuhah theihtawp kan chhuah a tul thu a sawi bawk.

He hunah hian Sialkal Range Development Council Chairman leh Lengteng bialtu MLA, L. Thangmawia pawhin SRDC chu Sial-kal tlangdung a chengte tihhmasawnna tur a nih angin eirukna tello in rinawmna leh thawhrimna nena kalpui a nih tur thu a sawi a. Health Development lamah te leh zirna lamah te, a bik takin Manpower Development lamah hmala tura ruahmanna siam a nih thu sawiin, mi thiam leh hmantlak tam tak an chhuah phah ngei a rin thu a sawi. SRDC Council Chairman chuan SRDC fund chu sum siamna remchang atana hman chi a nih loh thu leh hmalakna te chu party emaw zarzo tuma tangkai pui tum chi a nih loh thu sawiin, a phu leh awm a te chu mi taima te an nih thu a sawi a. SRDC tana ministry hmasa a bul lo tantu te leh hma la tute zawng zawng chungah lawmthu a sawi bawk.

Nimin a SRDC Office hawnna hun hi SRDC Member leh Champhai North bialtu MLA, Dr. ZR. Thiamsanga chuan kaihruaiin Sialkal tlangdung khua te midang ruala hmasawnna ke an pen ve theihna tura SRDC hmasawnna tura sawrkarin hma a lakna chu lawmawm a tih thu a sawi a. A tiphuisui tura Office hawn a ni thei chu lawmawm a tih thu pawh sawiin, Council din a nih chhan ang ngeiin Sialkal tlangdung khua ten hma-sawnna nasa tak an neih phah ngei a rin thu a sawi bawk.

SRDC hi kum 2012-a din a nih khan kumtin cheng nuai 50 hmuh thin chu SRDC huam-chhung ah hna hrang hrang - Retaining Wall, Slab culvert, PCC Pavement, Stone Masonry Step, Building, kawng laih leh adang te siam nan hman thin a ni a. Kum 2019-20 atang khan budget tipungin cheng nuai 200 dah a ni. Kum 2017-2018 khan kum danga Fund hmuh thin bakah NEDP Special Package atangin cheng nuai 50 dang dawn belh a ni a. Chumi atang chuan thildang bakah SRDC Headquarter Office, Mimbung hi sak a ni a. NEDP Special package atanga cheng nuai 35 bakah Normal Fund atanga cheng nuai 10 hmangin Office hi sak zawh a ni. SRDC Office building hi RCC structure niin chhawng thum a sak a ni a. Chairman leh Vice Chairman Office bakah Conference Room, Establishment Room, Staff Room leh Garage te a awm a ni.