Health Minister hovin Aizawl-ah World Cancer Day hman a ni

Nimin Feb. 4, 2020 hi 'World Cancer Day' a ni a, Aizawl-ah chuan Health & Family Welfare Department bultumin Health Minister, Dr. R. Lalthangliana hovin Assembly Annexe Conference Hall, Aizawl-ah hman a ni.
World Cancer Day puala inkhawm hi National Health Mission (NHM) Mission Director, Dr. Eric Zomawia chuan kaihruaiin he hun hmanpuitu Health Minister, Dr. R. Lalthangliana chuan cheng vbc. 500 zet senna tur Zemabawk-a Cancer Speciality Hospital sakna tur JICA te nen ruahmanna an siam fel tawh tih sawiin, “Rang takin bul kan tan thei dawn,” a ti a. He Hospital sak tura ruahman hi hmarchhak State te zinga Cancer enkawlna Hospital tha ber a nih a beiseiawm tih sawiin, Damlo enkawlna kawngah thiamna, hmanrua leh khawl tha te a pawimawh em em rualin thawktute inpekna a pawimawh lehzual tih a sawi a. Doctor te leh nurse ten damlo te an dawr dan a pawimawh thu pawh sawiin, an tawngkam leh thlamuanna aw-ka in damlo na tak tuar te nasa takin a chhawk thei a ni, a ti bawk.
Cancer hi kumtin khawvel pumah mi maktaduai 9.6 vel thihna thlen tu niin khawvela thihna thleng zawng zawng chawhruala hmun ruk-a thena hmun khat chu Cancer natna vang a ni a. Ram changkang te aiin ram changkanglo zawk (low and middle income countries)-ah Cancer avanga thihna thleng tam zawkin Cancer vanga thi za zela sawmsarih (70%) te chu heng ram changkanglo zawka thleng a ni a. Cancer thlentu hi thil chi hrang hrang a awm rualin a thlentu tam ber chu vaihlo niin Cancer natna za zela sawmthum (30%) hi vaihlo zuk leh hmuam vang a ni tih a sawi a, Mizoram-ah hian kum thum chhungin mi 2176 Cancer vangin an thi a. Chawhrualin kum khatah cancer vangin mi 725 thi thin ang a ni.
Khawvela mihringte thihna thlentu natna zingah Lung natna dawtah Cancer hi a sang ber a ni a. He natna laka inven dan, enkawl dan tur leh hmuhchhuah hma kawngah inzirtirna beihpuithlak nan Union for International Cancer Control (UICC) bultumin khawvel pumah World Cancer Day hi hman thin a ni a. Mizoramah pawh kum 2014 atang khan he ni hi kumtin hman thin a ni a. Thupui hi kum thum atan thlan thin niin kum 2019 atanga 2021 thlenga an thupui thlan chu ‘I am and I will’ tih a ni a. Nimin a he hun hmanna ah hian Dr. Jeremy L. Pautu, National Programme for Prevention and Control of Cancer (NPCDCS) State Nodal Officer leh Mizoram State Cancer Institute-a Radiation Oncology Head of Department ni lai, Dr. B. Zothankima te chuan he Ni thupui hmang hian thu an sawi bawk a ni.

Comments

Chhiar Hlawhte