CMS-a CCTV bun thar Serchhip DEO in a hawng

Chawngbuangi Memorial School Serchhip chuan nimin khan an School kum 32 tlin lawmna neiin an School-a CCTV an bun thar chu Serchhip District Education Officer (DEO), Zohmangaihi chuan a hawng nghal bawk.
Chawngbuangi Memorial School kum 32 lawmna leh CCTV Camera bun thar hawnna hun hi he School Headmistress, Lalthlamuani chuan kaihhruaiin he hun hmanpuitu Serchhip DEO, Zohmangaihi chuan he School in kum 32 a tling ta chu lawmawm a tih thu sawiin, he School a CCTV Camera bun a ni chu hmasawnna pawimawh tak a nih thu a sawi a. He CCTV an bun hmang hian zirlai naupang te thunun leh khuahkhirh kawngah hmasawnna a thlen ngei a beisei thu a sawi bawk.
Nimin-a he hun hmanna ah hian Pastor Jonathan Lalthansanga chuan hunserh hmangin Serchhip SDEO, Vanlalchhana pawhin thu a sawi a, he hunah hian School Management Committee member te leh sawmbik te an tel a ni.
Chawngbuangi Memorial School hi February 1, 1988-ah zirlai 50 vel neia bul tan niin kum 1992-ah Sawrkar atangin permission hmuh a ni a, kum 2000-ah Lump sum dinhmun ah hlankai niin kum 2008-ah Middle School Section chu Adhoc Aided dinhmun ah hlankai leh an ni a. Tunah hian Zirtirtu 13 leh zirlai 460 awmin Nursery atanga pawl 8 thleng zirna a awm mek a, Serchhip-a English Medium School hmasa ber te zing ami a ni.

Comments

Chhiar Hlawhte