Serchhip khawpui chhung Veng hrang hrangah kawngpui siamthat hna thawh mek a ni

PWD Serchhip Division chuan tunlai hian Serchhip khawpui chhunga inkalpawhna kawngpui hrang hrang cheithat hna an thawk mek a, tuna ruahmanna awmsa te chu tunkar chhungin an zo hman mai thei tih an sawi.

PWD Serchhip Division-a thawktute hnen atanga thu kan dawn danin PWD hian kumtin hna thawh tur atan hian ruahmanna siamin sawrkar thuneitu sang zawkah sum an dil thin a, kumin sawrkar kum kal mek (2019-2020) atan pawh hian hna thawh tur engemaw zat dilin, Serchhip in KTP General Conference a dawn tur an lo hriat tawh avangin kumdang aiin hna pawh an dil tam tih an sawi a. Heng an hna dil hrang hrang te hi sawrkar chuan rawn phal sakin sum pawh sanction a ni a, he sum hmang hian tunah hian khawpui chhung kawngpui chei that hna hi an thawk chho mek a, an hnathawh dan tura a lan danin kumin hian KM 14.024-a thui kawng siamna atan cheng nuai 219 chuang hret awm anga chhut a ni.

Tuna ruahman anga hna an thawh zingah Mizofed Office panna kawng siamthat hna te, P&E Veng-a Thlanmual kawng siamthat hna te, P&E Veng Hall atanga Judicial Veng panna kawng siamthat hna te, Serchhip Bazar Traffic Point atanga Chanmari Veng panna kawng te, Bazar tual atanga Bazar Hnuai panna kawng te, Bazar Hnuai-a Kapchawla (L) In atanga V. Rodingliana In te, Serchhip Chhim Veng-a Zakiamlova In atanga H. Rodinga In te chu an zofel tawh tih sawiin, tuna an thawh zawh tawh hi KM 3.404-a thui anga chhinchhiah a ni a, hei bakah hian Serchhip AOC Veng atanga P&E Veng kaltlanga IOC Veng panna kawng KM 3.160-a thui siamthat hna chu thawh mek niin hei hi tunkar chhung hian zawh hman beisei a ni a, Tuikhuah Veng atanga DIET panna, Lower Chanmari kaltlang-ah KM 2-a thui siam leh a ni dawn bawk a, he hna pawh hi hun reilote ah zawh hman beisei a ni. Hei bakah hian PWD hotute chuan kumin hian Paved Shoulder hnuaiah KM 6-a thui siamna tur sum an hmuh thu pawh sawiin, hemi hmang hian kawngpui an enkawl sa te tihzauh hna thawh mek a nih thu an sawi bawk a, tunhma lama an Department in kawng an enkawl sa tizau chung lova a siamthat hna an thawh thin chu he sum hmang hian tizau in kawngpui Blacktop chin chu a zau ta tih an sawi bawk.

PWD-a thawktute chuan tunhnaiah hlawhfa an van avangin an duh angin hna an thawk chak theilo tih an sawi a, hnathawktu tam takin an hlawh pek aia sang te an hlawh theih tawh avangin hlawhfa tur hi an vang hle tih an sawi a. An kawngpui siam te chu mipuite pawhin dim sak se an duh thu sawiin, kawngpui-a Iron Rod lo chhut mai te chu kawng tichhetu langsar tak a nih thu leh kawngpui sir-a khawl hmanga lei lai te pawhin kawngpui himna tur ngai pawimawh thei se an duh thu an sawi bawk.