Serchhip District Bawrhsap hovin MJA (SD) Annual Conference vawi 13-na hman a ni

MJA Serchhip District chuan Zirtawpni khan Annual Conference vawi 13-na neiin Serchhip District Bawrhsap, Dr. Lalzirmawia Chhangte chuan khuallian niin a hmanpui.

MJA Serchhip District Annual Conference hi SIRD Auditorium-ah neiin he hun hmanpuitu Serchhip DC, Dr. Lalzirmawia Chhangte chuan kumin January ni 13-ah Serchhip DC hna a zawm thu sawiin, a nihna ang angin Serchhip mipui ten an pawm nia a hriat thu leh a hlim thu leh amah pawh Serchhip-ah rilru bet thlapa hna a thawh thu a sawi a. Mitin ten kan hmalakna ah tumruhna kan neih chuan kawng a awm tih sawiin, sawrkar laipui ruahmanna pakhat, PMMVY hnuaiah Serchhip District chuan rampum huapa lawmman pakhat na a lak dawn thu a sawi a. Hei hian kawng hrang hrangah dik taka hma kan la anih chuan lawmman lak tur pawh kan nei zel ang tih a lantir nia a hriat thu a sawi a. Serchhip District chu Mizo hlang khua a nih avangin vanneihna tam tak a neih thu a sawi bawk.

Serchhip District Bawrhsap chuan India ram democracy ti ropui tu chu Chanchinbu miten zalenna zau tak neia sawrkar kalphung diklo nia an hriat lai te pawh an puangzar thei chu a nih thu sawiin, he zalenna hi a tha zawnga mipuite zirtirna leh kawng tha kawhhmuhna atana hman tum turin thuthar thehdarhtute chu a chah a, mipuite zirtirna kan pek tam phawt chuan nghawng tha a nei zel dawn tih sawiin, thuthar an thehdarh kawngah pawh midangte thu ziahsa lachhawng mai mai lova mahni ir-awm chhuak te dap taima turin a chah a. Mizo tan tam a pawimawh thu pawh Bawrhsap chuan sawiin, helam kawngah pawh thuthar thehdarhtu ten zirtirna an pek uar a pawimawh thu a sawi a. Kaldan pangngai a kal reng ngawt chu a tha ber lo tih sawiin, mipuite rilru hneh thei tur zawnga thuziah te pawh zir zel a tul thu a sawi bawk. Mizo mipui ten zirna kan uar chu a lawmawma a pawimawh em em rualin, zirna sang zawk zir kan tlem zel chu ngaihtuah chian a tul thu Bawrhsap chuan a sawi a, chhawrtlak thiamna, eizawnna atana hman theih zirna lam kan uar a pawimawh thu pawh a sawi bawk.

MJA Serchhip District Vice President, Kapliana Pachuau kaihhruai he hunah hian MJA General Hqrs. atangin Vice President, Lalremsiama leh MJA Serchhip District President, C. Ramengmawia te pawhin thu an sawi a. General Secretary leh Treasurer te hnen atanga report ngaihthlak niin chawhnu lamah rorelna hun an hmang bawk a. Kum 2020-2022 chhunga hruaitu tur thlanna neiin President-ah Kapliana Pachuau, Vice President-ah C. Ramengmawia leh Treasurer-ah R. Lalmuansanga te thlantlin an ni.