District Jail-ah Fundamental Duties zirhona neih a ni

/
India Republic Day lawmna kal zelah Ser-chhip District Legal Services Authority chuan Zirtawpni khan Serchhip District Jail-ah Legal Awareness Programme on Fundamental Duties an buatsaih a, Jail-a awm mek te tan Volleyball Tournament buatsaih nghal a ni.
Serchhip District Jail-a Legal Awareness Programme on Fundamental Duties hi District Legal Services Authority-a Member, R. Sanghmingthanga chuan kai-hruaiin he huna Resource Person Serchhip DRDA Project Director, H. Dolianbuaia chuan India khua leh tui ten khua leh tui kan nihna anga kan tih ve tur hrang hrangte sawiin, Jail-a awm mek ten nunkawng dik an zawh chhoh leh theihna tur atana an tih tur leh mawhphurhna hrang hrangte a sawi a, Pathian nen tangdun a an chhungril nun insiamthat chhoh a pawimawh dan te leh hmalam hun eng tak neitu an nih thu te sawiin, an hmalam hun atan duhsakna a hlan bawk.
He hun hman hi Serchhip District SP, R. Sathiyasundaram IPS pawhin hmanpuiin Jail chu inhremna hmun ni lovin insiamthatna hmun tur a nih thu leh Jail chhunga an awm chhunga anmahni insiamthat tum turin a chah a. Excise & Narcotics Department Serchhip-a Asst. Commissioner, B. Ngurchhuana pawhin Excise & Narcotics Department te hnathawh dan kal-hmang leh Sawrkar Dan ding laia Jail tang (Inmates) te hriattur pawimawh hrang hrang te a sawi bakah, nunkawng dik an zawh chhoh leh theihna turin a fuih bawk.
He hunah hian District Jail-a tang mek te, Serchhip-a Excise & Narcotics Department leh Police ten One-Day Volleyball Tournament khel zuiin tlai lamah zanriah an kilho bawk a ni.
Serchhip District Jail-ah hian tun dinhmunah Jail tang (Inmates) 105 awm mekin heng zinga 84 te hi Mipa niin 21 te chu Hmei-chhia an ni a, Hmechhia Jail tang zingah hian naupawm 2 an awm bawk a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »