Serchhip-ah YMA Kumpuan zirhona neih a ni

Serchhip Sub-Hqrs. YMA Kumpuan Committee buatsaihin Inrinni khan Serchhip-ah YMA Kumpuan, 'Zirna Uar' tih zirhona neih a ni.

Serchhip Sub-Hqrs. YMA Conference Hall-a he zirhona hi Serchhip Sub-Hqrs. YMA Kumpuan Committee Chairman, Lalzuiliana chuan kai-hruaiin Serchhip Sub-Hqrs. YMA President, R. Sanghmingthanga chuan thuhma sawiin, he zirhona hun hi a sawihawng a. Serchhip Sub-Hqrs. YMA President chuan YMA hian kum 1983 atangin Kumpuan neiin 'Faina' chu Kumpuan hmasa ber a nih thu a sawi a. Tuna YMA Kum-puan ni ta, 'Zirna Uar' chu kum 1996 leh 1997-ah YMA chuan Kumpuan atan lo hmang tawhin tun hi Kumpuan atana tum thum hmanna a nih thu a sawi.

Serchhip Sub-Hqrs. YMA President chuan nikum mai-a Mizoram in Lok Sabha in-thlanpui kan neih dawna harsatna kan neih khan zirna uar chungchang ah tan kan lak a tul zia chiang taka a lan thu sawiin, All India Service hrang hrangah Mizote kan tlem zel avangin kan ram-a sawrkar thuneitu sang ber berte hnamdang an ni zel tawh a, hei vang hian Mizo mipui ten zirna kan uar-a sawrkar a chanvo sang kan chelh zel theihna tura tan lak a tul tih a sawi a. Mizo ten ziak leh chhiar kan thiam thu leh rampum ah pawh kan lan thu sawiin, amaherawh chu chhawr tlak thiamna nei tura tan kan lak nasat a tul thu leh zirtirtu te pawhin an hna chu hlawh hmuhna atan chauh ni lo, mithiam leh chhawrtlak chherchhuak tura tan la zel tura a duh thu a sawi bawk.

Inrinni-a YMA Kumpuan zirhona hunah hian Serchhip Sub-Hqrs. YMA hnuaia Town Branch leh direct-a awp Branch 21 bakah Sub-Hqrs. YMA hnuaia Group hrang hrang aiawhte telin Central YMA in YMA Kumpuan bawh-zuina tura Group YMA leh Branch YMA te tihtur hrang hrangte zirho a ni a, sawihona hun hman a ni bawk.