Latest News

Leivung hmanga kawng hnawh tihtawp niin hlawhfa awmloh vangin kawng siam thei rihlo

Serchhip khawpui chhung paltlangtu National Highway-54 siamthat hna thawktu tur ten kawng khuar zual leivung hmanga an hnawh chu khawtlang mipui ten an duhloh avangin hna kallai tihtawp a ni a. He kawngpui siamthat hna thawktu turte chuan hnathawktu tur hlawhfa an hmuh chuan Vawiin atanga hna tan tura an inpeih thu an sawi bawk.

Serchhip khawpui chhung paltlangtu NH. 54 hi hun engemaw chen Mizoram State PWD ten an enkawl hnuah India rama National Highway neitu, Ministry of Road Transport & Highways (MORT&H) ruahmanna angin, NH-54 thenkhat, Zembawk dai atanga Tuipang thlengin, National Highways & Infrastructure Development Corporation Limited (NHIDCL) enkawl turin November 1, 2019 khan hlan a ni a. Hemi hnu hian NHIDCL chuan Serchhip Town chhung kawngpui siamthat hna thawk tur hian Mizoram Technocrafts Company (P) Ltd. chu ruaiin anni hian hun engemaw chen hna thawka kawng siamthat tur te an laih khuar hnuah sum ruahman chin an thawk zo nia insawiin, an hna hi laklawh takah an chawlhsan a. Hetianga hmalakna chawlhsan a nih avang leh kawngpui hmun tam takah laihkhuar a nih si avang hian Serchhip Sub-Hqs. YMA chuan Serchhip-a NHIDCL hotute chu kawmin kawng siamna tur sum hi ruahman belh leh turin an ngen a. Amaherawh chu sum hi ruahman ni mah se Contractor, Mizoram Technocrafts Company (P) Ltd. hi an inhnuhdawh tak avangin hna kallai chu a tawp ta tho a ni.
Hetiang harsatna a awm avang hian District thuneitute chuan tun thla ni 4 khan NHIDCL te chu hemi chungchang hi sawipuiin, Serchhip District chhunga hna thawka awm mek, Gammon Engineers te chu khawpui chhung kawngpui siam hna thawk tur hian rawih an ni a. Anni hian kawngpui te hi a nihna tur anga an siamthat nghal theihloh avangin kawng khuar zual chu leivung a hnawhin hei hi an kawng siamna huamtu khawtlang hruaitute chuan duh lovin Inrinni khan an hna hi an chawlh tir zui ta a ni.
Hetianga hna chawlhsan leh a nih tak avang hian nimin tlai khan Serchhip Sub-Hqrs. YMA Vigilance & Monitoring Committee hruaitute chuan NHIDCL hotute leh Gammons Engineer hotute chu kawmin kawngpui siamthat dan tur hi an sawiho a, Gammons Engineer hotute chuan leivung-a kawng hnawh chu an siam tum dan a nih loh thu leh kawng khuar chhe zual thawmna atan chauh an tih thu an sawi a. Tunah hian hna-thawktu (Labour) an neih loh thu leh Labour an nei a nih chuan chawlhkar khat chhunga Serchhip khawpui chhung chu a nih dan tur anga siam zawh hman an beisei thu sawiin, anmahni in an hlawhfa pangngai an chah dawn chuan thla khat vel tal hun an mamawh tur thu an sawi a. Hei vang hian YMA hruaitute chu ni khat0a Rs. 400/- hlawh tura hlawhfa tur zawnpui tura ngenin, an hmu a nih chuan Vawiin atanga hna tan nghal tura an inpeih thu an sawi a. Nimin tlai atang khan YMA te pawh hian hlawhfa tur hi an zawnpui nghal a ni.

Comments

Popular News (Last 30 Days)