Serchhip-ah National Deworming Day hmangin Rulhut hlo pek beihpui thlak a ni

Rulhut avanga natna kan kai theih te tihbona tura Rulhut hlo pekna Ni, National De-Worming Day chu nimin khan India rampumah hman niin Serchhip-ah pawh District Bawrhsap, Dr. Lalzirmawia Chhangte chuan he beihpuithlakna hi a hawng a ni.
IOC Veng Anganwadi Centre No. I-a he beihpuithlakna hawnna hunah hian District Bawrhsap, Dr. Lalzirmawia Chhangte chuan India sawrkar chuan a ram mipuite hriselna a ngai pawimawh tih sawiin, hei vang hian natna thlen thei hrang hrang laka an him theihna turin ruahmanna a siam thin thu leh hemi ang hian tun tumah pawh Rulhut laka kan him theihna turin Rulhut hlo pek beihpui hi thlak a nih thu a sawi a. Kan thil ei avangin kan taksa ah Rulhut a awm theih thu sawiin Bawrhsap chuan, kan taksa-ah a lo awm tawh chuan inthlahpung in chaw tha te ei mah ila a lo ei ve zel avangin kan hrisel thei chuanglo tih a sawi a. Hei vang hian ei leh in ah kan fimkhur a tul thu leh a bik takin Sa ei kawngah fimkhur a tulin, Sa thianghlim chauh ei a pawi-mawh thu a sawi a, hei bakah hian thil kan ei dawn reng rengin Kut fai taka sil a pawimawh thu te pawh a sawi bawk.
Nimin a Rulhut hlo pek beihpuithlakna hun hi Serchhip CMO, Dr. Laldawngliana Sailo chuan kaihruaiin he beihpuithlakna hi kumtin tum hnih neih tur a nih thu leh August 10 khian kumin atan beihpui hi thlak leh a nih dawn thu a sawi bawk.
National De-Worming Day hi Mizoram-ah chuan School Education Department, Social Welfare Department leh Health Department tangkawp buatsaihna hman niin tun tumah hian naupang kum 1 atanga kum 19 hnuailam te hnenah Rulhut hlo hi pek tura ruahman a ni a, District pumah hian mi 18,498 te hnenah hri danna hi pek tura ruahman niin nimin khan zirna In hrang hrang leh Anganwadi Centre-ah Rulhut hlo hi pek a ni a, nimin a hri danna pek hmanloh te chu ASHA leh Health Worker ten an In-ah kalchilhin Rulhut hlo hi pek chhun-zawm a ni leh dawn a ni.

Comments

Chhiar Hlawhte

Serchhip-a YMA Branch hrang hrang kum 2020 HRUAITU TE