Serchhip-ah Fire Prevention Week hawnna neiin kangmei venna a hmalak dan tur sawiho a ni

Kangmei venna Hapta, Fire Prevention Week 2020 chu nimin khan Serchhip District-a kalpui turin Serchhip District Bawrhsap, Dr. Lalzirmawia Chhangte chuan a hawng a. District Level Fire Prevention Committee thutkhawm pawh neih niin kangmei venna kawnga hmalak dan tur hrang hrang sawiho a ni bawk.

Serchhip DC Conference Room-a Fire Prevention Week 2020 hawnna hunah hian District Bawrhsap, Dr. Lalzirmawia Chhangte chuan kumtin Mizoram-ah kangmei chhuak a awm thin thu sawiin, In leh lo te kangin vanduaina nasat lehzualna ah phei chuan nunna chan hial te pawh an awm thin thu leh sum leh pai, kan ro te pawh a kangral thin tih a sawi a. Hei vang hian kangmei laka fimkhur tura inzirtir chu thil tul leh pawimawh tak a ni tih sawiin, khawtlang huap punkhawmna ah te, zirna In leh hmun dang dangah pawh inzirtirna hi kalpui a tul thu a sawi a. Hetianga inzirtirna hi uluk taka kalpui a nih chuan kangmei chhuak thin tam tak hi kan veng thei a ni, tiin vanduaina tam tak chu fimkhur chuan pumpelh theih a nih thu a sawi a. Kan ram hi chenna tlak atana kan siam zel theihna turin kan ramngaw chhe tawh te ngaw-ah kan siam thar leh a tul thu pawh sawiin, hemi atan hian theihtawp chhuah tura he huna kalkhawmte chu sawmin he Hapta hi a hawng a ni.

Nimin a District Level Fire Prevention Committee thutkhawm ah hian Serchhip District Bawrhsap, Dr. Lalzirmawia Chhangte chuan ram kang avanga kan ramngaw chhe zel leh a chhunga cheng ramsa an lo chereu zel chu sawrkar in ngai pawimawhin hetiang hian kangmei Venna kawnga mipuite inzirtirna hun hi buatsaih a nih thu a sawi a. “Kangmei hlauhawm zia leh ramin a tawrh nasat theih zia hrechiangtute vek kan ni a, chutihlaiin kan rama mipui tam zawk ten lonei-a ei kan la zawn avangin ram tihkan palh theihna remchang a tam em em bawk si a. Mitin kan fimkhura ram tikang lo tura tan kan lak a tul hle a ni,” a ti a. Sawrkar pawhin ram kang hi a duhlo em em a, State Level te, District Level Committee te dinin Village Level thlenga din turin hma a la mek a ni, a ti a. Mipuite chu kangmei laka kan ram a him theih nana tlawmngaih chhuah tur leh uar lutuk awm lova inzirtir turin a ngen bawk.

He hunah hian District Level Fire Prevention Committee-a Member Secretary leh Thenzawl DFO, Margareth Lalramchhani chuan kum kalta chhunga an hmalakna te leh ramngaw chungchanga Serchhip District leh Mizoram dinhmun te tarlangin, kum 2009 atangin Mizo-ram-ah ramngaw khuh chin chu a tlahniam zawnga a kal zel thu tarlangin, Serchhip District bikah chuan kum 2017-ah ramngaw in a khuh chu Sq. KM 1158 a nih laiin 2019-a chuan Sq. KM 1161.65-ah pungin hetianga ramngaw pung hi Mizoram-ah Serchhip leh Mamit District chiah a awm thu a sawi.

DFO Thenzawl chuan Forest Survey of India in Satellite kaltlanga an zirchianna atangin nikum January atanga June thla thleng khan Mizoram ah kangmei chhuak 9490 hmuh niin heng te hi Mizoram-a DFO ten an enfiahna hnuah Mizoram-a kangmei chhuak hi 1452 niin chung zinga 1357 te chu Lo hal a nih thu a sawi a, hmun 12 chu ram kang niin a dang 83 te chu Cha hal niin hei hian lo hal avang ni lo ah chuan kan ramah kangmei chhuak a tlem tih a tilang tih a sawi bawk.

He Meeting hian Fire Prevention Week chhunga hmalak dan tur te, kumin |hal chhunga ram kang tur venga hmalak dan tur te, mipui zirtirna kalpui dan tur te, ram tikangtute laka hremna na zawk lek dan tur leh District intih-siaknaa lawmman an lak ngei theih dan tur te, Village Level-a kangmei ven kawnga tithate lawm-man pek dan tur te leh thil pawimawh dang te an rel nghal a ni.