Latest News

L&L Football-ah Semi Final khel tur hriat kim a ni ta

Serchhip-a L&L Football Tournament khelh mekah nimin khan Quarter Final khelh zawh niin FC Serchhip Kawnpui leh Thenzawl Dinthar FC te chuan an khingpui te hnenah Semi Final an lut.
Serchhip District Football Association (SDFA) in a buatsaih, Lalsawmliani & Lal Thanchunga Memorial Football Tournament, DC Playground-a khelh mekah hian nimin khan Quarter Final khelh chhunzawm niin inkhel hmasa zawkah FC Serchhip Kawnpui chuan AWC FC chu penalty Shoot-out ah an hneh a, heng Team pahnih te hi hun pangngai ah goal khat ve ve pe-a inhnehtawkin FC Serchhip Kawnpui tan minute 36-na ah Darthanmawia chuan goal a khung a, hei hi hun tawp dawn minute 87-na ah AWC FC tan Lalramchhana chuan a sut hram a. Hun pek belh ah pawh chak zawk an awm loh avangin penalty Shoot-out hmanga chak zawk zawnna neih niin FC Serchhip Kawnpui chu 5-3 in an chak ta a ni.
Nimin a inkhel hnuhnung zawkah Thenzawl Dinthar FC chuan Chhekhnai FC chu 3-1 a hnehin Semi Final an lut bawk a, Thenzawl Dinthar FC tan PC. Lalruatsanga, Zakaria Lalhriatpuia leh Jeremy B. Laldinpuia te chuan goal khungin Chhekhnai FC goal awmchhun hi Vanlallawma khung a ni thung.
Heti hian Semi Final lut te hriat kim niin tunkar Inrinni khian Semi Final hi khelh a ni dawn a, Inrinni chawhma dar 10:00-ah Semi Final hmasa zawk chu Vengchung FC leh FC Serchhip Kawnpui ten khelin chhun dar 12:00-ah New Serchhip FC leh Thenzawl Dinthar FC ten Semi Final hnuhnung zawk an khel leh bawk ang.

Comments

Popular News (Last 30 Days)