Electoral Roll thar tlangzarh niin Serchhip District-ah vote nei 51,000 an awm

Kumin January ni 1-a kum 18 tling chin te laa Electoral Roll siamthat hna chu zawhfel niin Serchhip District Election Officer, Dr. Lalzirmawia Chhangte chuan Electoral Roll chu nimin khan a tlangzarh ta a. Electoral Roll thar-a a lan danin Serchhip District pumah Vote nei thei mi 51,000 an awm tawh dawn a ni.

Electoral Roll thar tlangzarhna puala inkhawm tawi nimin chawhnu-a a Pisa-a neih ah District Election Officer, Dr. Lalzirmawia Chhangte chuan Election Commission of India in ruahmanna a siam anga Serchhip District-a Electoral Roll siamthat hna tluang taka zawhfel a ni ta chu lawmawm a tih thu sawiin, hemi atana thawktu ERO, AERO, BLO leh Political Party bakah NGO te chungah lawmthu a sawi a. India ram chu Democracy ram kan nih thu leh kan aiawha roreltu tur thlang thin kan nih avangin Electoral Roll dik leh felfai neih chu a pawimawh thu pawh sawiin, hei vang hian Election Commission of India chuan kumtin Electoral Roll siamthat hna hi a kalpui thin thu a sawi a. A chang chuan Intensive Revision neiin a chang chuan Summary Revision te neih a nih thu sawiin, Intensive Electoral Roll Revision-ah chuan Electoral Roll pumpui siamthat hna thawkin Summary Revision-ah chuan Electoral Roll awmsa chu Draft Roll-ah hmangin Electoral Roll siamthat hna hi thawh a nih thu a sawi a. Tuna Electoral Roll siamthar ah chuan Vote nei zawng zawngte thlalak tarlan a nih thu pawh sawiin, ECI in Schedule a rawn siam anga tluang taka he Electoral Roll siamthat hna hi thawh a nih thu a sawi a. Electoral Roll thar-a punna sang lutuk leh hniam lutuk-ah zawhna an dawn thin thu pawh sawiin, Serchhip District-a Vote nei punna chu a hniam lam nia a hriat thu pawh sawiin Electoral Roll thar hi a tlangzarh a ni.
He hunah hian Election Officer, Vanlal-hmachhuana chuan Serchhip District-a Electoral Roll thar dinhmun tlangpui tarlangin Serchhip District-ah hian Polling Station 81 awmin General-ah Vote nei thei Mipa 24,721 leh Hmeichhia 25,883, an vaiin Vote nei thei 50604 an awm a. Heng bakah hian Service Voters Mipa 394 leh Hmeichhia 2, an vaiin mi 396 awm bawkin hemi nen hian Serchhip District pumah Vote nei thei Mipa 25,115 leh Hmeichhia 25,885, an vaiin Vote nei thei 51,000 an awm a. Electoral Roll enfiah hna thawk tur hian nikum December 16-ah Draft Electoral Roll chu tlangzarh niin tihtur ang ang te tihfel a nih hnuah tun thla ni 2 khan peihfelin nimin khan tlangzarh a ni ta a ni.
Tun tuma Electoral Roll Summary Revision-ah hian Serchhip District pumah Vote nei thei hi 1.63% in a pung tih he hunah hian tarlan a ni bawk.
Nimin a Electoral Roll thar tlangzarhna hunah hian Serchhip District chhunga ERO leh AERO te bakah Political Party hrang hrangte aiawh leh NGO aiawhte bakah BLO thenkhat te an tel a, Electoral Roll tlangzarh a nih hnu hian Recognised Political Party te hnenah Electoral Roll thar hi semchhuah nghal niin mipui a duh apiangte tan en theih a ni ang.

Comments

Chhiar Hlawhte

Serchhip-a YMA Branch hrang hrang kum 2020 HRUAITU TE