Hlawhtlinna chang te Sports Minister in a lawmpui

Sports Minister leh Mizoram State Sports Council President ni bawk, Robert Romawia Royte hovin nimin khan International inelna a Medal la naupang pathum leh Republic Day Camp a tel Mizo NCC thalai 6 te lawmpuina hun hman a ni.

Sports Minister Office, Aizawl a he hun hmanna ah hian Sports Minister chuan kum khat chhungin Sports & Youth Services Department hnuaia hmasawnna leh hlawhtlinna tam tak a awm thu sawiin, tunah Boxing leh Muaythai a hlawhtlinna leh Republic Day Camp-a NCC cadet 6 lai tel thei kan nei chu lawmawm a tih thu a sawi a. Midangte tana chona siamtu leh Role model ni turin heng thalai hlawhtling te hi a chah a. Sports a hlawtlinna chang te tan chapona neih a awl thu sawiin, heng thalai hlawhtling te hi chapona lak a fihhlim turin a chah bawk.

Kumin January 30 atanga Feb. 3 chhunga Borca, Sweden-a Golden Girls International Boxing Tournament neih ah Rudy Lalhming-muani  chuan Kg. 66 Category-ah Silver Medal a la a. Nikum December thla a Abu Dhabi, UAE-a IMFA Asian Muaythai Championship neih ah Joseph Vanlalhruaia chuan Kg. 48 Category-ah Silver Medal la in, Eliza Zoramchhana in Kg. 34 Category-ah Bronze Medal a la a. 

Republic Day Camp a tel tur hian NCC Cadet te hian inelna hrang hrang an paltlang a ngai a. Cadet nuai chuang atangin mi 120 vel Directorate pakhat atangin thlan chhuah niin tun tuma Mizoram atanga tel te hi– Vanlalchhanhimi; Ngurnunsanga Sailo; Ruthi Rochanpuii; Joshua Remlalliana; Samuel PC Lalhriatpuia leh K. Lalmuanpuii te an ni a. RDC hi NCC cadet tan chuan an thlen theihna sang ber a ni a. Mizo NCC cadet te hi tun tumah Prime Minister’s Rally ah te, National Intergration Awareness programme ah te leh inelna dangah te an zuk tel a ni.