Dy. Chief Minister hovin Media Workshop neih a ni

Information & Public Relations Department leh Central YMA tangkawp buatsaihin nimin khan Central YMA Hall, Tuikhuahtlang-ah YMA Chanchinbu enkawltute pualin chanchinbu enkawl dan zirhona 'Media Workshop, 2020' neih a ni.

Nimin-a 'Media Workshop, 2020' neih hi Deputy Chief Minister, Tawnluia chuan hman-puiin YMA chu thalaite a nawlpuia an fuan-khawmna, kan khawtlang leh hnam nun timawitu a ni tih sawiin, YMA thiltumte chu a zahawmin kan hnam leh khawtlang nun innghahna lung-phum pawimawh tak a ni, a ti.

Deputy Chief Minister chuan YMA Branch hrang hrang atanga YMA chanchinbu enkawltu kalkhawmte chu fakawm a tih thu sawiin, hlawh pawh nei lova, hun leh tha seng a khawtlang hmasawnna atana tlawmngaih chhuahtu an nih thu leh an hnathawh chu ropui a tih thu a sawi a. YMA chanchinbu chu khawtual mipuiin an chhiar leh bengkhawn, mipui beng ti vartu a ni a, tunlai khawvelah eizawnna a dang tawh a, hunawl kan neih tlem tawh lai hun a thenawm khawveng te inkara palai hna thawk a, inpawhna tha siam sak tu a nih thu a sawi bawk.

He hunah hian khual zahawm I&PR Director, Lallianpuii pawhin YMA Chanchinbu enkawltute chu an pawimawhna te sawiin, Social Media hman fimkhur inzirtir a pawimawh thu a sawi bawk.

Central YMA hian I&PR Department nen a tangdunin kum 1999 atang khan Media Workshop hi an buatsaih tan a, tum 15 zet Media Workshop hi buatsaih tawhin I&PR Department nen tangdun hian vawi 13 an buatsaihna a ni a. Nimin a Media Workshop-ah hian Aizawl khawchhung YMA Branch 83 leh Aizawl khaw-pui pawn YMA Branch 58 atangin YMA chan-chinbu Editorial Board Member te telin 'YMA Chanchinbu enkawl dan' tih leh 'Chanchinbu kal-phung bihchianna' tih te chu zirho a ni.