Aizawl khawpui-ah zirlaite an pungkhawm

Kum 2017-a MSU hruaitute'n Mizo Zirlaite thlavang an hauhna avanga case awrh tir an a nih chungchngah nimin khan Aizawl City College Joint Student Union te huaihawtin Vanapa Hall kawtah zirlaite pungkhawmin Chakma House bul thleng kawng an zawh a. An phut anga Chakma House khar a nih avang leh Chakma Students Hostel sak chhunzawm a nih loh avangin tlai dar 2:30 velah an tindarh.
Nimin-a Aizawl-a Zirlaite punkhawmna hunah hian MSU President, Vanlalliana Khiangte chuan Chakma-te laka Mizo zirlaite thlavang hauhtute thlavang Mizoram-a hauh a ngai ta chu lungchhiatthlak an tih thu sawiin, “Hnamdang te vanga Mizo leh Mizote thubuai (Case) insiamsakna a thleng fo hi sawrkar leh ram hruaitute inenfiah se kan duh,” a ti a. Mizote kan fin var tawk loh avangin Chakma ten District Council hi an nei tih hi thangtharten kan pawm tlan a ngai tih sawiin, “A party ang zawnga inbei tur tumah kan awm lo,” a ti a. “Hnamdangte chuan an hnam tana tha lo tura an ngaih ah chuan an hna tha te pawh a kalsan ngam a. Vangvat anga he ram min zuktu  avang hian engvangin nge a Mizo leh Mizo zawk kan in tihbuai char char mai le?” tiin kan sawrkar Officer-te pawhin hnam chungchangah chuan dan chhung piah lamah tih angai a nih pawhin; kawng zawnga ti ve ngam tur chuan an sawm thu a sawi bawk.
Nimin-a kawng zawhtu Zirlaite hian chhun dar 12:00 velah Chakma House an pan a, House thlen hma deuhah Aizawl SP, C. Lalruaia, Magistrate leh MSU leh ACCJSU hruaitute an inbia a, Zirlai pawl hruaitute chuan an thilphut, MSU hruaitute thubuai chinfel a nih loh chuan Chakma House hawn leh Student Hostel sak mek thawh chhunzawm an remtih loh chu a hlawhtlin leh hlawhtlin loh enfiah an phut thu an sawi a. Magistrate leh Police-te kaihhruaina hnuaiah zirlai pawl hruatute chuan an thilphut hi enfiah zuiin hlawhtlinga an hriat avangin zirlaite an tindarh ta a ni. 
Zirlaite an tindarh hma hian resolution pahnih - ‘Hnamdangte vanga Mizo zirlaite leh mipuite tawrhna hi tunhnuah thleng tawh suh se’ tih leh ‘Ram leh hnam tana zirlaiten hma an lakin, Mizoram sawrkar leh Police-te hian zirlaite case siamsak tawh suh se,’ tih an pass a ni. MSU hruaitute hnen atanga thudawn danin, National Institute of Technology-a zirlaite thlavâng hauhna avanga MSU hruaitute thubuai chu thubuai thehlutuin a withdraw avangin nimin khan Court chuan a titawp a. Mizo zirlai inkhel mekte Chakma-te'n kut an thlak vanga Mizo zirlaite thlavâng MSU-in a hauhna lama thil thlenga sawrkarin MSU hruaitute court case an siamsak chungchangah pawh thubuai thehluttu in a thubuai thehluh a withdraw dawn a. He thubuai hi Court chuan February 25, 2019 hian a ngaihtuah ang.

Comments

Chhiar Hlawhte