Fire Station 3 neih leh tuma hmalak tan mek a ni

Home Minister, Lalchamliana chuan Mizoram-ah Fire Station 14 a awm thu leh District thar pathum (3)-ah Fire Station neih tuma hmalak tan mek a nih thu a sawi.
Kumin atana Kangmei venna Hapta, Fire Prevention Week 2020 hawnna nimin a Aizawl Vanapa Hall-a neih a hmanpuina ah he thu hi sawiin Home Minister, Lalchamliana chuan kangmei chhuak tur ven a pawimawhzia leh ramngaw humhalh a pawimawh zia hi hrechiang tawh viau in inhre mah ila kan inzirtir nawn a kan inhrilhriat that reng a tul a ni, a ti a. “Mei hi thunun a nih loh chuan kangmei-ah a lo chang thin a, mihringte mai bakah nungcha leh thlai, ramngaw, sik leh sa thlengin nasa takin kan tawrh phahin chhiatna rapthlak tak a thleng thin a ni,” tiin kangmei hi kan fimkhur tawk loh vang leh kan inthlahdah vanga lo chhuak a nih fo thin avangin, kan lo fimkhur zual leh theihnan hun bik nei a inzirtir pawh hi a pawimawh hle a ni, a ti a. Fire Station huamchhunga awm ten kangmei chhuah leh rikrum thilah Helpline number 101 a hrilh thin tur leh hmundang a awm tan Police Emergency Response Support System (ERSS) number 112 a hrilh thuai thin turin mipuite a ngen a ni.
Aizawl-a Fire Prevention Week hawnna hun kaihruaitu Environment, Forests & Climate Change Minister, TJ. Lalnuntluanga pawhin Kangmei Ven Hapta hman chhungin mipuite hnenah ramkang leh kangmei hrang hrang laka him inzirtir uar lehzual tum a ni tih sawiin, “Sawrkar laipui leh Mizoram sawrkar pawhin kangmei ven chungchang hi an veiin a ngaipawimawh em em a, 12th Finance Commission in ram kang ven nan leh ramngaw humhalhna sum tam zawk sen a tul thu a sawi a, a hnu a Finance Commission thar in din apiangin ngaihpawimawh a hlawh ziah thin a ni,” a ti bawk.
Kangmei laka kan him theih nan Mizoram sawrkar chuan lo hal tur zawng zawngte chuan March ni 15, 2020 hma a hal vek turin a hriattir a, Lengpui Airport leh a chhehvela lo hal turte chuan tlailam dar 3:30 hnu lamah chauh hal turin a hriattir bawk a. Hei bakah hian kumin hian District leh Khaw hrang hrang zingah kangmei ven kawnga thawk tha lawmman siam a ni dawn bawk a, District leh Khua te zinga kangmei veng tha lawmman pakhatna in Rs. 50,000/- leh citation, pahnihna in Rs. 30,000/- leh citation, pathumna in Rs. 20,000/- leh citation an dawng dawn a ni.
Kangmei Venna Hapta hi nimin vek khan Mizoram-a District khawpui hrang hrangah te pawh a hawnna hi hman a ni a, he Hapta hi tun thla ni 15 thleng hman tura ruahman niin he Hapta hman chhung hian mipuite hnenah kangmei laka fimkhur a tul zia inzirtirna chu uar taka kalpui a ni dawn a ni.

Comments

Chhiar Hlawhte