MZU Southern Campus lawmna neih a ni

Nimin khan HPC Lunglei leh NGO Coordination Committee tangkawp buatsaihin Lunglei-a Convention Centre-ah Mizoram University Southern Campus lawmna neih a ni.
Nimin a Mizoram University Southern Campus lawmna hi Higher & Technical Education Minister, Dr. R. Lalthangliana chuan khuallian nia hmanpuiin MZU Southern Campus Lunglei-a din phalna hmuh a ni ta chu Pathian malsawmna ropui tak a ni tih sawiin, he Campus neih theihna tura sulsutute thawhrimna leh thahnem ngaihna rah a ni, a ti a. MZU Southern Campus ti hlawhtling tur hian Department Official-te leh MZU hotuten theihtawp an chhuah thu sawiin, nikum chhung khan amah ngei pawhin sawrkar laipui-a Ministry of Human Resource Development-a Minister leh Secretary-te hnenah vawi engemawzat a thlen thu a sawi a. “Zirna lamah Mizoram in hmasawnna tur tam tak kan nei a, degree nei satliah ni lova thiamna dahzai leh chhawr tlak kan neih a tul a ni,” tiin MZU Southern Campus chuan Mizo mipuite zingah zirna lama harh tharna a thlen ngei a beisei thu a sawi bawk.
MZU Southern Campus-ah hian Class tan thuai thei tura hmalakna chak taka kalpui mek a nih thu pawh sawiin Dr. R. Lalthangliana chuan, Pukpui-a Engineering College building chu Temporary Campus atan cheng vbc. 11 senga thawm that leh siam that hna thawh mek a nih thu a sawi a. Permanent Campus pawh Pukpui ramchhungah din tum a nih thu sawiin, Campus leh building tha leh changtlung tak din ngei anih theihnan mipuiten neitu rilru pu chunga mahni zawn theuhah theihtawp chhuah turin a sawm bawk.
Lunglei High Power Committee Vice Chairman, Lawmawma Tochhawng MLA kaihhruai he hunah hian hualzahawm Lunglei West bialtu MLA leh Agriculture Minister, C. Lalrinsanga chuan Mizoram University Southern Campus chu Mizoram mipuite, a bik takin chhim lam District te tan malsawmna ropui tak a ni tih a sawi a. He Campus neih theihna tura hun rei tak atanga hun leh tha leh ngaihtuahna lo sengtu zawng zawngte chungah lawmthu a sawi a. Mihring theihna leh thiamna tih hmasawn (Human Resource Development) leh ram hmasawnna (economic development) chu thil kalkawp tlat an nih thu a sawi bawk.
He hunah hian Lunglei NGO Coordination Committee Chairman, Lalrotluanga chuan MZU Southern Campus ti hlawhtling tur hian NGO hrang hrang intelkhawm ten kum 2008 khan NGO Coordination Committee an din thu a sawi a. He Campus nawrchhuak tura hma latu te chungah lawmthu sawiin, Campus tha leh changtlung leh zirna tha tak kalpui a nih theihnan NGO Coordination Committee chuan theihtawp chhuah zel a tum thu a sawi bawk.

Comments

Chhiar Hlawhte