Rulhut hlo pek dan tur zirhona neih a n

Karleh Thawhtanni-a National Deworming Day hman tur pualin Serchhip-a zirna In hrang hrang aiawhte chu nimin khan kohkhawm niin naupangte hnena Rulhut hlo pek dan tur sawihona neih a ni.

Hei sawihona Serchhip CMO Conference Hall-a neih hi Serchhip CMO, Dr. Lal-dawngliana Sailo chuan kaihruaiin National Deworming Day chu kalpui reng ni mah se uluk zawka kalpui zel a tul thu a sawi a, Mizote hi thlai hring ei nasa ni chung si in thisen tlachham leh thisen nei tlem kan tam tih zirchianna ah hmuh-chhuah thin a nih thu a sawi a. Hei hi a ruka kan taksa a thisen lo ei ve tu, Rulhut vang a ni thei tih sawiin, hei vang hian a bik takin naupangte ah Rulhut hlo pek chu ngaih pawimawh a tul thu a sawi bawk.

He hunah hian Serchhip CMO Office-a Medical Officer, Dr. Samuel-a chuan he huna kalkhawmte chu zirtirna pein kum 2015 atangin February ni 10-ah leh August ni 10-ah National Deworming Day hi hman thin a nih thu sawiin, India ram chu lei atanga natna kan kai theih, Rulhut natna ang chi hluarna ber a nih avangin sawrkar pawhin theihtawp chhuaha hma a lak thu a sawi a. Hei vang hian he hmalakna hi theihtawp chhuaha kalpui a tul thu a sawi bawk.

He sawihona huna hian zirna In hrang hrang aiawhte te bakah Health Worker te telin naupangte hnena Rulhut hlo pek dan tur leh hemi kaihhnawiha report hrang hrang pek dan tur te pawh sawiho nghal a ni a, zawhna leh chhanna hun te pawh hman nghal a ni bawk.