Serchhip-ah MNF Workers Meet neih a ni

MNF East Block Serchhip chuan nimin khan District Panchayat Resource Centre, Serchhip-ah Workers Meet an buatsaih a, he hun hi Adviser to Chief Minister, C. Lalramzauva chuan khuallian niin a hmanpui a ni.
MNF East Block Workers Meet-ah hian Adviser to Chief Minister, C. Lalramzauva chuan MNF party chu Pathian in hun tha a pe tih sawiin, kum khat chuang awrh chiah an la sawrkar chungin India ram leh khawvel hriat ah Mizote chu nasa taka pholan kan nih thu a sawi a. Kan sawrkar hotu, kan MLA leh Minister te chu Mizoram enkawl tura Pathian ruat an ni tih sawiin, “An hruaina hnuaiah Mizoram leh kan bial-in nasa takin hma a sawn zel dawn a ni tih hi a rinngam a ni,” a ti a, Kum 20 chhung ram leh hnam tana an beihna chu Pathian in a hre reng a, rinawm taka an hnung an zui a, an dinngheh a tul thu sawiin, “Kan zinga la tello te pawh kan duhsak zia hriaa an lo tel ve theihna tura kawng kan lo hawn zau zual zel a tul a ni,” a ti.
Adviser to Chief Minister chuan Pathian in an hotute kut chu a ti hmui nia sawiin, buaina leh harsatna te chu sutkian sak an nih thu leh an sawrkar hun chhungin an hmalakna chi hrang hrangah te pawh hlawh-tlinna an hmuh thu a sawi a. Inkalpawhna kawngpui tha siam kawngah hmalak a nih thu te, Mizoram chhimlam-a MZU Campus dinna tura hlawh-tlinna hmuh a nih thu te, sawrkar in Health Care Scheme a siam chu mi harsa zawkte pawhin an chhawr theihna turin Private damdawi In te pawhin sawrkar rate siam an pawmpui thu te sawiin, heng hmalakna te pawh hi mipui ten an hriat a pawimawh thu a sawi bawk.
Adviser to Chief Minister chuan Serchhip leh a chhehvel-ah Pathian in ram tha tak min pe tih pawh sawiin, Agriculture leh Horticulture hmalakna hlawhtling tak tak avangte in Serchhip mai ni lo, Mizoram hmundang ami te pawhin malsawmna an dawn theihna kawng kan nih theih thu leh tunah ngei pawh khawvel hmundang ami te pawhin min tlawh mek thu a sawi bawk.
MNF East Block Workers Meet hi an President, T. Zadingliana chuan kaihruaiin an Party General Hqrs. atanga rawn kal J. Lalchhuanliana, Secretary leh midangte pawhin thu sawiin, kan hma lawka Village Council leh Local Council inthlanna lo awm turah sawrkar dawr ngam tur thlantlin a pawimawh thu sawiin, Party hmangaihtu leh Pathian ring mi thlantlin a tul thu an sawi a. Chutiang tur chuan Candidate siamna ah pawh party-a Senior te ngawt dah pawimawh lo tur leh mi tha, kan ram leh sawrkar tan pawha tha tur thlanchhuah a tul thu leh chutiang mite tan chuan hak pawh zauh a pawimawh thu te an sawi bawk a ni. Nimin a he hun hmanna ah hian party mi thahnem tak an tel a ni.

Comments

Chhiar Hlawhte