Adviser to Chief Minister in Serchhip tlawhin hmalakna hrang hrang a tlawhkual

Adviser to Chief Minister, C. Lalramzauva chuan zankhat riak turin nimin khan Serchhip a rawn thleng a, PWD (Highway) Circle Office building, KTP General Conference neihna tur Pandal leh Vawiin atanga Para-Gliding intihsiakna neihna tur hmun te a tlawh.

Adviser to Chief Minister, C. Lalramzauva hian nimin zing khan Aizawl atanga Serchhip rawn thlengin chawhma lamah New Serchhip-a BRTF hmun hluia PWD (Highway) Circle Office building tura sak, tuna an luah leh takloh chu tlawhin helai hmun hi Presbyterian English School, New Serchhip leh Zoar Deprived Children Home atan luah mek a ni a. Thudawn danin tunhnai khan Serchhip a sawrkar Department pakhat chuan he building hi Office atan luah an dil a, hei hi phalsak an nih chuan helai hmun luah mektute hian awmna tur an nei dawn lo tih sawiin, harsatna an tawh hrang hrangte an lo thlen bawk a ni.
Hemi hnu hian Serchhip P&E Veng-a tun thla tawp-a KTP General Conference neihna tur Pandal sak mek pawh Adviser to Chief Minister hian tlawhin, Organising Committee hruaitu ten an lo dawngsawng a, tun dinhmun ah Pandal hi peih thawkhat niin a Stage siamrem hna leh cheimawi hna chu thawh mek a ni a, inbuatsaihna hrang hrangte chu tha a tih thu sawiin, tluang taka Conference pawh neih theih a beisei thu a sawi a. Hei bakah hian Leisekawt Mual laihzauh a nih avanga leivung paihna tur siam mek te pawh tlawhin, Mual sir-a Side Drain siam hna thawh bakah Mual zauhna tura dawl zawl a nih theihna a bula Anganwadi Centre thiah taka leivung dawlna tur siam mek te pawh a tlawh nghal bawk a, hnathawh te chu tha thawkhata a hriat thu a sawi bawk a ni.
Hemi hnu hian Vawiin atanga International Para-Gliding Accuracy Championship-2020 neihna tur hmun, Bawngchawm tlang pawh Adviser to Chief Minister hian tlawhin a thlawhchhuahna hmun leh a tumna hmun tura inthiarna, tui in tur, bawlhlawh paihna tur, he hun hmang tura mipui kal te chawlhna tur te pawh en fel a ni a. Engkim peihfel ah an ngai a. Hemi hnu hian Adviser to Chief Minister hi Bawngchawm tlang atangin hian thlawhchhuahpui niin Zawlpui-a tumna tur hmun ruahman ah an tum leh bawk a ni.

Comments

Chhiar Hlawhte