Dy. Chief Minister in hawng

Deputy Chief Minister, Tawnluia chuan nimin khan Aizawl-a Administrative Training Institute (ATI)-ah Multi Level Car Parking leh Video Conference Hall a hawng a. Hemi rualin ATI Auditorium-ah ATI in Ministry of Commerce hnuaia International Standard Organisation (ISO) Certification a dawn lawmnaah a tel nghal a ni.

Multi Level Car Parking leh Video Conference Hall hawnna hunah hian Deputy Chief Minister chuan kum 2018 atanga UD&PA Department hmalaknaa Bus Lian leh Motor 29 vel park theihna Multi Level Car Parking chu ATI hnathawk bakah ATI a training kal ten tangkai taka an hman a beisei thu a sawi a. Khawpui chhunga motor parking tha neih chu Smart City Scheme thil tum pakhat leh tun Sawrkar pawhin a ngaih pawi-mawh ber te zinga mi a ni, a ti a. Deputy Minister chuan Sawrkar hnathawk leh State Service hrang hrang ten thurawn engtik lai pawha an pek theih thu leh finchhuah zel turin a sawm bawk.

Nimin a hawn tak Multi Level Parking ah hian Motor 29 vel a leng a, cheng nuai 140 seng a UD&PA sak a ni a. Kum 2018 October atanga sak tan niin kumin January-ah sak zo a ni. Hei bakah hian Video Conference Hall hi cheng nuai 3 senga sak a ni a, hmun hla atanga training kal theilo te tana hman tangkai tur leh man chawia hawh theiha siam a ni.

ATI, Mizoram hi kum 1983 a din a ni a, hun rei tak chhung Building nei lova an awm hnuah kum 2015 khan UD&PA hmalakna in NBCC atanga sum hmuin tuna ATI Building, MINECO hi sak a ni a. Tun dinhmunah hian Auditorium 13 awmin thawktu 43 an awm a. ATI-ah hian sawrkar hnathawkte hnenah Rules leh Regulations zirtirna leh training bakah NGO hnenah te thupui thlanbik neiin training a buatsaih thin a. Mizoram hmun hrang hrangah Core Faculty ten kal chilhin Department mamawh danin training a buatsaih thin bawk a. Kum 2019-2020 chhung hian training buatsaih tur 75 hmachhawp an nei mek a ni.