ZPM in kumin atan Aizawl-a an Office an hawng

Zoram Peoples’ Movement (ZPM) chuan Aizawl-a an Office chu kumin atan nimin khan an hawng tan a. Office hawnna puala inkhawm ah hian Independent MLA, Vanlalhlana chuan Independent MLA 7 te chuan ZPM sawrkar theih nan theihtawp an chhuah dawn tih a sawi.
Nimin-a ZPM Office hawnna hunah hian ZPM President Lalliansawta chuan aan kawng chu Pathian-in an keukuak sak mek tih sawiin, “Zoram mipui hian party pahnihte hi thlak kan chak tawh hle a ni,” a ti a, “Kan kawng hi sial sakin kan awm mek a, ‘ram chu Lalpa ta a ni a, hnam tin chunga roreltu a ni si a’ tih angin, Bru, Chakma, ramri leh CCA chungchangah te, ZPM tan hian hamthatna min siam sak tam hle a, party pahnih hotu thlan dan chungchangah te hian ZPM tan ‘min vuak dup sak’ a ni,” a ti bawk.
He hunah hian Independent MLA, Lalduhoma pawhin kan ram chu thuang hnihin a kal mek nia sawiin, “Kan ram leh hnam hi thendarhin kan lo awm ta. Chu chu Hindu lal ram din duhtu ten ‘dam reng rawh se’ an ti a. Chumi duhlo tute chuan ‘bang rawhse’ an ti,” tiin “Assam-ah NRC avangin Hindu ringawt pawh nuai 19 zet an hmuchhuak a, chumi tuam dam turin a hrin chu CCA hi a ni,” a ti bawk.
Independent MLA, Vanlalhlana pawhin he hunah hian thu sawiin ZPM chuan mithar duhawm tak tak hmangin kum bul an tan thu a sawi a, “ZPM hi ram nghahfak kan ni. ZPM mipuite thlantlin Independent MLA te hian ZPM a sawrkar ngei theih nan theihtawp chhuahin tan kan lak dawn avangin kum 2023 inthlanah chuan ZPM in sawrkarna a la ngei ang. Kan kawng hi keimahni thawh ni lovin, a insialsa ah kan kal a ni,” a ti bawk.

Comments

Chhiar Hlawhte