Mizoram State Museum in Museum Week hmang tan

Mizoram State Museum, Art & Culture Department buatsaihin nimin atang khan 'Museum Week' chu hman a ni a, tunkar Zirtawpni thleng hman a ni ang.

Nimin atanga hman Museum Week hawnna hun hi Art & Culture Director, R. Hming-thanzuala chuan hmanpuiin Mizo hnam hrang hrangte in unauna vawng thar leh turin kan in unauna ziarang vawng nung rengtu Museum hi kan hlut lehzual a tul thu a sawi a; “Mizoten kan ram leh hnam hmasawnna tura ke kan pen lai hian kan nihna min hriatchian tirtu Museum hi ngaihlu zel ang u,” a ti bawk.

Mizoram State Museum-ah hian Gallery 6 (paruk) a awm a, Museum objects 2679 lak-khawm ni tawhin heng zinga 729 te hi show case chi hrang hrang 109-ah phochhuah a ni a. A bak zawng hi Reserve Collection-ah dah a ni. Tribal Museum, Ranchi-ah te, Bhopal Museum-ah te, Silpigram Museum, Guwahati-ah te, Jawaharlal Nehru Museum, Itanagar-ah te Mizo hnam hmel lanna Museum Objects engemaw zat thawn (Donate) a ni tawh bawk. Mizoram State Museum hian 2018-2019 sawrkar kum chhung khan tlawhtu mi 13157 an nei a, Museum en man atangin sawr-karah Rs. 41,430/- an chhunglut a, Museum tlawhtu zinga mi 33 te hi Foreigner an ni a, mi 14 te hi VIP leh VVIP an ni bawk.

Mizoram State Museum hi Ni bika a thlawna Museum en theih ni tih lohah chuan tlawhtu an tam lem lova. Ni bik, a thlawna Museum en theih hunah entu an tam em em thin a. Chung ni te chu ‘Museum Week’ leh ‘International Museum Day’ te an ni. Entry fee hi puitling pakhat tan Rs.20 /- leh naupang pakhat tan Rs.10 /- a ni a. School naupang zirtirtute hruaia Educational Trip-a kalte chu 50 % concession pek an ni a. Kum upa, kum 65 chin chung lam te chu en man chawitir an ni lo bawk.