Paper hmanga Thleng leh No siamna tlawh

Environment & Forest Minister, TJ. Lalnuntluanga chuan nimin khan Sairang Sihhmui-a Paper hmanga Thleng leh No siamna, LH Paper Industry a tlawh a. Helai hmun enkawltute chuan an hmalakna lo hrilhfiahin, an hnathawh hi AMC leh Planning Board hotute pawhin an tlawh tawh thu an sawi a. Tunah hian ni khatah thleng 3,000 vel chauh an la siam theih avangin Order an hmuh sa pawh an pek sen loh thu leh khawl dang an chah belh mek thu Minister hi an lo hrilh a ni.

LH Paper Industry a tlawhna ah hian Forest Minister chuan tunlaiah khawvel sik leh sa danglam zel leh leilung chhe tur ven nana Plastic lam chi kalsan tura inzirtirna uar taka kalpui a nih laia Mizo pa ngeiin Environment tichhe lo tur, Thleng leh No an siam leh State dang awt lo tura theihtawp a'n chhuah chu lawmawm a tih thu a sawi a. Helai hmuna an hnathawhna hmun hrang hrangte tlawhkualin an dinhmun hrang hrangte a en bawk a ni.