Tripura-a Tuikuk awm mek te Tripura-ah an awm nghehna turin inremna ziah a ni ta

Mizoram atanga Tripura-a Tuikuk raltlan te Tripura-a an awm nghehna tura Home Ministry in ruahmanna a siam anga inremna chu nimin khan ziahfel a ni ta a. Mizo Students' Union chuan he inremna (agreement) ziah ni hi Mizoram tan ni lawmawm leh hun chhinchhiah tlak a nih thu  an sawi.

Mizoram atanga Tripura-a Bru chhuakte Mizorama let leh tura beihpui vawi tam tak thlak a nih tawh hnuah nimin khan khan New Delhi ah Home Minister Amit Shah, Mizoram Chief Minister Zoramthanga, Tripura Minister, Biplab Kumar Deb leh Bru aiawhten inremna thuthlung hi an ziak a, he inremsiamna hnuaiah hian November ni 30, 2019 hnu lama Tripura Relief Camp a la awm mekte chu an duhthlanna in Tripura-ah an cheng hlen thei dawn a. Repatriation lo kalpui tawh a Mizoram a kir leh te tan erawh Tripura-ah let leh remtih a ni dawnlo a. Tripura sawrkar chuan an State chhunga Relief Camp a cheng mek zat chu enfiahna thar hlak siam in, Resettlement kalpui a nih zawh hnu chuan heng Relief Camp te hi khar tawh tur a ni a. India sawrkar chuan sum leh mamawh dang Tripura sawrkarin a neih te theih ang chen chenah a pui dawn a ni.
Relief Camp atanga Tripira a awm nghet turte hi chhawmdawlna, Rehabilitation package chhungkaw khatah cheng nuai 4 zel  pek an ni ang a. In sakna tur ram ft. 30x40 a zau pek tur niin chhungkaw tin hi In sak tanpuina Rs. 150,000/- theuh pek an ni ang. Heng bakah hian Tripura a awmna tur hmun thar an khuar tirh atanga kum hnih chhung chu chhungkaw tinte hi thla tin Rs. 5000/- theuh puihna pek an ni anga, a thlawna Ration pein Tripura sawrkar in a remchan dan angin PRC leh ST Certificate a buaipui sak dawn bakah Electoral Roll-ah an hming te thun sak thuai tura beisei a ni bawk.
Hetihlai hian MSU General Hqrs. chuan nimin khan thuchhuah siamin Tuikuk-te Tripura State a an awm nghehna tura inremna (agreement) ziah ni chu Mizoram tan ni lawmawm leh hun chhinchhiah tlak a nih thu sawiin, Tripura state chhung Camp paruk (6) a la khawsa mek Tuikuk te Mizoram khua leh tui an nihna paih a ni tur leh Mizoram Electoral Roll a hming chuang zawng zawngte pawh an Voters ID tihtawpsak vek tur alo ni ta te chu lawmawm an tih thu an sawi bawk.

Comments

Chhiar Hlawhte