Cheng nuai 129.95 senga Serchhip-a Taxation Staff Quarters sak thar hawn a ni

Cheng nuai 129.95 senga Serchhip-a Taxation Department Staff Quarters sak thar chu nimin khan Commissioner of State Tax, Kailiana Ralte chuan a hawng a. Mizoram-a District Capital zawng zawngah Taxation Office neih vek anih theih nan chak taka hmalak mek anih thu a sawi.

Serchhip Khawtetlang ram-a Taxation Staff Quarters sak thar pali (4) hawnna hunah hian Commissioner of State Tax, Kailiana Ralte chuan Taxation Department chu Mizoram sawrkar tana Chhiah laluttu pawimawh ber an nih thu leh Chhiah lut atanga zaa 70 vel chu an Department kaltlanga lut a nih thu sawiin, Mizoram sawrkar a kal chhung chuan an pawimawh zel dawn tih a sawi a. Hetiang taka an pawimawh avang hian sawrkar pawhin kawng hrang hrangah a duhsak thu sawiin, heng sawrkar duhsakna an dawn zawng zawngah hian an lawm hle tih a sawi. 
Commissioner of State Tax chuan an Department chu Department naupang tak an nih thu sawiin, kum 1990 chho ah Serchhip-ah an Department hmunhma tur zawngin Khawtetlang-ah hian mimal ram an lei leh khawtlang in an pek te an neih thu a sawi a. Kum 1993-ah Office sain kum 1994-ah amah ngei pawh Inspector hna chelha alo awm tawh thu sawiin, amaherawh chu khatihlai khan an awmna hmun chu ramhnuai, mipui tana dawr harsatna hmun a nih avangin thuneitu remtihna in hmun laili ah Office an luah tak thu a sawi a. Hetianga an kal lai hian an ramchhung ah In lo sa te an awm thu leh chhuak tura tihna a awm hnuah pawh In tha zawk an la sa zel chu pawi a tih thu a sawiin, a tul anga hma an lak zel dawn thu a sawi a. An Department Office tur hmun laili zawka an dap zelah sawrkar hmasa hunlai khan Serchhip Treasury ramchhung ah an tehfel tawh thu a sawi a, Cheng nuai 420 hi Estimate siamin a sakna tur pawh hi an hmuh ngei a beisei thu a sawi bawk.
Serchhip-a Taxation Department Complex hawnna hun hi Joint Commissioner of State Tax, Lalthansanga chuan kaihhruaiin PWD Project Division-IIIa JE, C. Lalzarliana chuan he building an sak dan Technical Report a pe a. Nimin a hawn tak Taxation Quarters hi Type-II Quarters leh Type-III Quarters pahnih (2) ve ve niin SPA sum cheng nuai 129.95 senga sak a ni a, heng building hi March 23, 2016-ah sak tan niin Jan. 13, 2017-ah sak zawh a ni. Type-III Quarters hi cheng nuai 73.06 senga sak niin Unit hnih a awm a, Type-II Quarters hi cheng nuai 56.88 senga sak niin a chhawnga sak a ni bawk a. RCC Building niin PC. Vanlallawma, Serchhip in a sak a ni.

Comments

Chhiar Hlawhte