Tripura Relief Camp-a awm zinga Mizoram-a Vote nei te Dan angin E. Roll atang paih dawn

Tripura Bru Relief Camp 6-a awm Mizorama vote nei, Tripura a awm hlen turte hming chu dan anga Mizoram Electoral Roll atanga paih tur a ni dawn a. Lok Sabha inthlanpui neih hnuhnung berah khan Tripura Relief Camp 6-a awm Bru zinga Mizoram-a vote nei hi mi 12,081 zet an awm a ni.

Mizoram Chief Electoral Officer, Ashish Kundra chuan Tripura a inbengbel nghet tur zinga Mizorama vote neite hi The Representation of the People Act, 1951 hmanga chinfel tur an nih thu a sawi a. Dan ang takin an chungchang hi kalpui a ni anga, Electoral Roll ennawn mekah chinfel hman a ni kher lo thei a, ennawn leh hunah chuan Mizoram Electoral Roll atanga paih a, Tripura Electoral Roll a thun tawh zawk an nih a beiseiawm thu a sawi. Election Department hotu dangte chuan Mizorama vote nei Bru ho hi engzat chiah nge Tripura-ah inbengbel hlen dawn tih an hriat theih mai rih loh thu an sawi a. Tripura a cham hlen zinga Mizorama vote nei hi 11,000 chuang an nih erawh an ring thung.

Nikum April ni 11-a Mizoram Lok Sabha bial khat inthlanna-ah khan Tripura Relief Camp 6-a awm Bru zinga Mizorama a vote nei chu mi 12,081 an ni a. Bru vote neite hi 2018 November-a Mizoram Assembly inthlanpui-ah leh Lok Sabha inthlanpui-ah hian Kanhmun-a an puala Polling Station 15 siam-ah vote thlak tir an ni a. Tripura sawrkarin vote thlak tura an kalna tur lirthei ruahman sakin Kanhmun-ah vote an thlak a ni.

Nikum October ni 3 leh November ni 30 inkar khan Bru hruaikir hna vawi 9-na leh a hnuhnung ber kalpui a ni a. Hetah hian chhungkaw 456 a khawsa mi 1,165 hruaikir an ni a, an zinga mi 709 te chu puitling an ni a, anni hi Mizorama vote nei vek pawh ni sela Tripura a inbengbel zui turte zingah hian vote nei mi 11,372 an la awm dawn tihna a ni a. Vote nei zinga Mizorama lokir te leh Tripura a awm hlen turte hi Election Department lam chuan thliar fel an tum thu an sawi.

Tarlan tawh angin Ningani khan Union Home Minister, Amit Shah kaihhruaina-in Delhi-ah Mizoram-a kir duh lo Bru 34,000 chuangte chu Tripura a an awm zui phalsak an ni ta a. Heta inremna an ziahnaah hian State pahnih Chief Minister te an tel a, Chief Secretary Lalnunmawia Chuaungo chuan Mizoram sawrkar aiawhin inremna thuthlungah hian a hming a ziak a ni. Inremna thuthlung ang chuan Tripura a Bru-te inbenbelna atan hian sorkar laipuiin cheng vaibelchhe 600 chuang a pe dawn a ni.