A zu zuar chi chuan kan kal dawn lo hrim hrim, Zu kan khap tlat dawn - Zoramthanga

MNF President leh Chief Minister, Zoramthanga chuan sawrkar-in Zu a khap chungchangah rin thu leh thil dang mi thenkhatin an bawlphuan nasa hle tih sawiin, “A zu zuar chi chuan kan kal dawn lo hrim hrim, Zu kan khap tlat dawn,” a ti.

Kumin (2020) atana Aizawl-a MNF Office, Mizo Hnam Run hawnna puala inkhawm nimin a neih ah MNF President leh Chief Minister, Zoramthanga hian thu sawiin Zu khapna dan duan mekah rawtna hrang hrang a awm thu sawiin, “Dan hmasa lama lo awm tawh, Zupui leh Zufang ang chi te Kut nia entira pholante a tha em, tihte rawtna a awm a. Inrawntawnna kalpui mek a nih laiin Zu zuar leh tur ang lek leka sawina a awm a ni,” a ti a. “Zu hi kan khap tlat dawn a, Zu khapna dan hi a tul angin Kohhran leh midang dangte nen inrawntawnin a tul ang zela kalpui a ni ang,” a ti bawk.

MNF President chuan Pathian in MNF Party a tivul mek nia sawiin, “Zoram leh Zofate par vul hun a thleng mek a, Hnam thinlung-pu zawng zawngte MNF-ah lo lawilut zel turin ka sawm che u a ni,” a ti a. India hmarchaka remna leh muanna a awm theih nana hmanrua ah India sawrkar chuan Zoram leh a Chief Minister a mamawh nia sawiin, hmalak mek a nih thu leh hmachhawp thahnem tak a awm thu a sawi bawk.

He hunah hian Lok Sabha MP, C. Lal-rosanga pawhin thu sawiin beihna leh diriamna a tawh laiin support-tu leh tawngtaipuitu tam tak a nei tih a hriat thu leh lawmawm a tih thu a sawi a. “Parliament Committee peng 2/3-ah Committee member turin min dah ve a. Coal & Steel lamah member ka nih ve angin kan ramah hetiang lama hmalakna tur awm hria chuan thurawn min pe turin ka ngen che u a ni,” a ti.

North East tana Central Budget 10% dah, vaibelchhe tam tak hman lovin a awm nia sawiin MP chuan, “Hemi chungchang hi hmar-chhak MP rual pawhin kan sawikhawm tawh a, Union Finance Minister Nirmala Sitharaman hnenah pawh kan sawi a, hmalak a tum thu a sawi a ni,” tiin “Pathian in he kan ram hi min siam a tum a, min thlahthlam dawn lo,” a ti bawk.