Sub-Hqrs. YMA Conference neih hun tur relfel a ni

Serchhip Sub-Hqrs. YMA chuan April 15-17, 2020 chhung khian Serchhip Sub-Hqrs. YMA Conference vawi 7-na neih nise an ti.

Serchhip Sub-Hqrs. YMA hian nimin khan an President, R. Sanghmingthanga kaihhruaina hnuaiah SEC thutkhawm neiin Sub-Hqrs. YMA Conference neih tur chungchang hi an sawiho a, he Meeting hian Sub-Hqrs. YMA Conference vawi 7-na Thentlang-a neih tur hi April 15 atanga 17, 2020 chhung khian neih nise an ti a, he Conference neih tur atan hian Sub-Hqrs. YMA Fin. Secretary, Kawlthuama kaihhruaina hnuaiah Programme Committee an din nghal bawk.

Kumin a Sub-Hqrs. YMA Conference neih tur hi hruaitu thlan kum a nih avangin YMA Dan Bu in a sawi anga Nomination siam tur Branch tan February thla ralhmain thehluh nise an ti a, Conference a ngaihtuah tur Agenda thehlut tur pawhin hemi chhung hian thehluh nise an ti bawk.

Heng bakah hian nimin a SEC thukhawm hian Sub-Hqrs. YMA hnuaia Cultural Troupe ten thla thar-a NYK hnuaia Hyderabad-a North East Youth Festival neih tura kal an dilna chu an remtih sak a. Serchhip Kawnpui North Branch YMA ten an Branch hming thlak an dilna chu Serchhip Kawnpui Branch inthen dawn laia Agreement nen a inmilloh avangin kaltlangpui loh nise an ti bawk a. Serchhip khaw thang zelah Thlanmual indaihlohna thlirin Thlanmual intawm (Common Cemetry) neih a nih theih nan hmalak nise tiin a tul anga lo zirchianga hma la turin Committee an din bawk.