Retailer atanga dik taka thil hralhna tur Electronic Point of Sale Device semna sem

Retailer dawr tina buhfai leh thildang hralh chhuahna tur khawl, Electronic Point of Sale Device semna leh hetiang khawl hman dan zirhona chu nimin khan Aizawl-a Dawrpui Multipurpose Centre-ah neih a ni.
Food Security Act, 2013 in a ken tel Electronic Point of Sale Device semna leh Mizoram chhungah hetiang khawl hman a nih theih nana training buatsaih hi Deputy Chief Minister, Tawnluia chuan hmanpuiin hetiang thil thar Mizoram in kan hmang tur chu lawmawm a tih thu a sawi a. A lo-a kan awm theih loh kan chawpui ber lakkhawm chu sawrkar chuan Supply Department kutah dahin a semchhuah hna chu Retailer ten an thawk tih sawiin, he an hnathawh hi dawrkai dang te nen a inanglo tih leh mahni mimal hlawkna chauh atana thawk an ni lo tih hriaa rawngbawlnaa ngaia an hna te thawk turin Deputy Chief Minister chuan retailer-te a chah a ni.
Fair Price Shop Automation tana khawl hman thin hi ePoS (electronic Point of Sale) khawl niin bukna khawl (electronic weighing machine) a keng tel a, he khawl hi Visiontek siam niin he khawl hian Finger Print Scanner, Touch Screen, QWERTY Keypad, Thermal Printer, SIM Card Slot pahnih leh WiFi Adapter te a nei a. A tul chuan Mit note (iris) scanner pawh a vuah belh theih a ni. Operating System-ah Linux a hmang a. A application hman mek hi Mizoram milin AePDS Team, NIC, Hyderabad ten an siam a ni. He khawl hian Ministry of Consumer Affairs, Food and Public Distribution, National Informatics Centre (NIC) leh Unique Identification Authority of India (UIDAI) te duh dan (guideline) a zawm vek a ni. He khawl hmang tur hian FPS data leh Ration Card Data te hi Digitized vek an ni tawh a. He Data lakkhawm hmang hian chhungkaw tinte ration dawn zat tur bithliah a ni a. An dawn tur zat bithliah hi ePOS khawlpui (server) ah dah vek niin server atang hian Data a mamawh ang te lain, ration hralhna te a update leh zel dawn a ni.
Ration la tur chuan an chhungkaw Ration Card number emaw, a Aadhaar number emaw POS machine-ah hian chhulutin Finger Print Scanner-ah a kut zungtang a nem ang a. A Aadhaar number leh a finger print a inmil chuan an chhungkaw ration lak theih zat quota a lo lang ang a. POS khawl nena inzawm Electronic Weighing Device-ah a ration lak tur zat buk a ni ang a. A lak zat dik tak a chhinchhiah nghal zel dawn a ni. Engemaw avanga fingerprint authentication hi a dik theih loh chuan SMS hmangin One Time Password a lo thleng anga, chumi hmang chuan ration a lak theih dawn bawk a ni. He khawl hman tan a nih hunah chuan a dawng tur dik tak mipuiten an chanpual, buk dik takin an la thei ang a. Retailer te hralh bang a hriat theih vek tawh dawn avangin hralh ruk emaw, tihcingpeng emaw a theih tawh dawn lo a ni.

Comments

Chhiar Hlawhte