Serchhip khawpui faina tur sawihona neiin Ui khuahkhirh dan tur ruahmanna siam a ni bawk

Serchhip khawpui chhung Faina atan leh Ui khuahkhirh kawnga hmlak dan tur ngaihtuah in nimin khan Serchhip Town Sanitation Task Force leh sawmbik te chu Serchhip DC Conference Hall-ah an thukhawm a. Serchhip khawpui chhunga khawlai-a Ui vak mai mai titawp turin Ui khuahkhirh dan tur ruahman a ni.

He thutkhawm hi Serchhip Town Sanitation Task Force Chairman leh Serchhip DC, Dr. Lalzirmawia Chhangte chuan kaihhruaiin kan hma lawkah Serchhip khua in K|P General Conference leh Para-Gliding a khawvel huap intihsiakna a thlen dawn thu sawiin, hei vang hian faina kawngah nasa lehzuala hmalak a tul thu a sawi a. Hei bakah hian Mizoram khawpui fai thlanna ah pakhatna ni mek kan nih avang leh kan hma lawkah Swachh Survekshan hnuaia khawpui fai thlanna neih leh a nih dawn avangin khawpui fai ber ni tura hma kan lak a tul thu a sawi a. He Meeting a tel te chu he huna an thurel bawhzui ngai awm ang angte bawhzuitu nih tuma hma la zui turin a chah a. Serchhip khawpui chhunga Ui khuahkhirh chu mipuite leh tlawmngai pawl te pawhin an ngaih pawimawh a nih avangin hmalak ngei ngei a nih dawn thu a sawi bawk.

He thutkhawm ah hian Serchhip Town Sanitation Task Force-a Member Secretary leh Serchhip District Urban Development Officer, Vanthangpuii chuan an Meeting koh chhan leh thu ngaihtuah tura chhawpchhuah te a tarlang a, he Meeting-ah hian Serchhip Town Sanitation Task Force Member te bakah Town chhunga VC hrang hrang leh YMA Branch aiawhte an tel a ni.

He Meeting hian 'Mizoram Solid Waste Management Bye-Laws' hman mek chu en-nawnin a paihna tur hmun lova bawlhhlawh paih thin te pawisa chawi tir thin Rs. 100/- chu Rs. 200/- ah tihsan nise an ti a. UD&PA Department in bawlhhlawh an paihna Motor hmanga bawlh-hlawh paih thin te hnena chhungkaw pakhat zela Rs. 20/- khawn thin chu Rs. 50/- ah tihsan nise an ti a. Heta sum hmuh te atang hian Rs. 30/- chu sawrkar-ah chhunluh a ni anga, UD&PA Department motor hmang tangkai phaklo te sum thawhkhawm erawh chu a vaiin VC ten anmahni huamchhunga bawlhhlawh paih Motor thlen phaklohna a bawlhhlawh khawnkhawmna atan an hmang dawn thung a. He Dan chung-chang zirhona hi VC te tan hun remchang hmasa ah neih nise an ti bawk.

Ui khuahkhirh chungchangah The Mizo-ram Animal Control & Taxation Act, 2014 leh The Lushai Hills District (Village Council) Act, 1952 behchhanin Ui khuahkhirhna siam nise tiin, heng dan-a a inziah angin Ui reng reng a neitu ten an kai anih loh chuan khawlaia an vahchhuah phal a ni lo anga, Ui neituten an Ui vulhte VC hnenah an register vek a ngaih dawn bakah VC ten an veng chhunga Ui vulh zawng zawngte chu chhinchhiahna mumal takin an vawng tha anga, he dan hnuaiah hian Ui, a neitute kaih lova pawn a chhuak man an nih chuan Rs. 500/- thleng pawisa an chawi thei dawn a, VC te hnena an pawisa chawi tur pe duhlo a mahni Ui vulhlai lakchhuah luih an tum chuan Rs. 500/- dang chawi tir leh theih ani bawk anga, VC te thupek zawm duhlo te chu The Lushai Hills District (Village Council) Act, 1952 in a sawi angin an lakah hian Court-ah Criminal Complaint thehluh tur a ni dawn a ni.

Hei bakah hian kan hma lawka Ser-chhip in K|P General Conference leh Para-Gliding intihsiakna a thlen tura khawpui fai zawk neih theihna tura hmalak dan tur pawh he hunah hian sawiho nghal a ni a, Serchhip Town VC ten an remchan dan ang a a tam thei ang ber hnatlang kova, khawtlang thenfai hna thawh thin tura tih niin sawrkar Department hotute nen pawh a theih anga tangtlang tura beisei a ni

Nimin a thutkhawm ah hian VC hrang hrang aiawhte leh YMA Branch hrang hrang aiawh mi thahnem tak an tel a ni.