Serchhip District Bawrhsap in damdawi In a tlawh

Serchhip District Bawrhsap, Dr. Lalzirmawia Chhangte chuan nimin zing khan Serchhip District Hospital chu tlawhin an dinhmun hrang hrang a enfiah.
Serchhip District Hospital tlawhtu District Bawrhsap hi Serchhip CMO, Dr. Laldawngliana Sailo leh Dr. ZD. Lalmuanawma bakah thawktu dang ten lo dawngsawngin Bawrhsap hian Out-Patient Department (OPD), Nau neihna Ward, Nausen enkawlna hmun, Mipa leh Hmeichhe Ward, Cabin, Laboratory, Trauma Centre, Casualty leh Eye Ward bakah Room hrang hrangte tlawhin an dinhmun chu thawktute hian an lo hrilhfiah a. Damdawi In enkawltute chuan an damdawi In chu khum 60 awm theihna a nih thu te, OPD building chu a tet deuh avang leh Doctor 8 lai thut theihna tura ruahman a nih bawk si avanga damlo te an tawt thin thu an lo sawi a. Thawktu lamah a bik takin Nurse an indaihloh thu leh tunah hian Nurse 23 chauh awmin chawlh la an awm loh chuan indaihtawk chiah chiah ang vel an nih thu an sawi a. Generator lian an neih chu senso a san thu te, Solar Energy siam theihna an neih chu hman theih a nih loh thu te, Oxygen chu sawrkar atangin bur 60 bak an hmuh theihloh avanga Private atanga an lak thin thu leh Mortuary pawh tangkai taka hmanga YMA ten a mamawh apiangte hman tura Kuang an dah thin thu te an lo hrilh bawk a ni.
Bawrhsap chuan Serchhip damdawi In-a khawl hrang hrangte a enkual hnuah hmanrua te chu kan nei tha thawkhat nia a hriat thu sawiin, OPD tawt lutuk chungchangah kan damdawi In chu a hmunhma a laili avangin Re-Design tula a hriat thu a sawi a. Tui Supply an hmu tha chu lawmawm a tih thu sawiin, hriselna chu mitin tan rohlu a nih avangin mipuite kan dama kan hrisel zel theih nana hnathawhna hmunpui, kan Hospital te chu tha taka kalpui tul a tih thu a sawi a. Thawktute pawh indaihlo chung chunga theih-tawp an chhuah thinna ah lawmthu a sawi bawk.

Comments

Chhiar Hlawhte