Serchhip-ah District Bawrhsap in Zeng hri danna pek beihpuithlakna a hawng

Mizoram pumah nimin atang khan naupang kum 5 hnuailam te hnenah Zeng hri danna pek beihpui thlak a ni leh ta a. Serchhip-ah pawh nimin zing khan District Bawrhsap, Dr. Lalzirmawia Chhangte chuan he beihpuithlakna hi hawngin hri danna pek nghal a ni.
Serchhip District Hospital OPD Tual-a Zeng hri danna pek beihpuithlakna hawnna hunah hian District Bawrhsap, Dr. Lalzirmawia Chhangte chuan sawrkar laipui leh Mizoram sawrkar chuan mipuite tan hamthatna tam tak siamin hriselna lamah phei chuan mipui nawlpui huapa hmalakna tam tak a awm thu a sawi a. Kan hrisel lohna avanga harsatna kan tawh thin te chuan kan hmasawnna tur a dal thin avangin hri danna pawh chi hrang hrang ruahman a nih thu leh heng te hi a dawng tur dik tak ten an dawn loh chuan a hnua enkawl dam leh chu sum leh pai tam tak senna te a nih avangin, sawrkar in hri danna lak hun tura a ruahman te chu kan ngaih pawimawh a tul thu leh kan bengkhawn a tul thu a sawi a. A hun taka invenna lak chu keimahni tan theuh a pawimawh avangin ‘Tihdam aiin inven a tha zawk’ tih chu kan vawn reng a tul thu leh tuna Zeng hri danna pawh hi a la tura ruat naupang kum 5 chin hnuailam zawng zawng ten kokim taka an lak ngei a pawimawh thu sawiin, District chhunga he vaccine la thei chin ten kim taka an lak vek theih nan khawtlang hruaitute, tlawmngai pawl leh nu leh pa te chu thawhpuiah sawmin hei beihpuithlakna hi a hawng a, he huna tel naupang kum 5 hnuailam te hnenah hri danna a pe nghal a ni.
He hun kaihruaitu Serchhip CMO, Dr. Laldawngliana Sailo chuan Zeng hri chu India ram atanga umbo anga ngaih theih a nih thu leh amaherawh chu kan ram thenawmah ala awm avanga inven zui zel nana vaccine te chu kalpui zel a nih thu a sawi a. District chhung khaw tinah hri danna pekna tur bik hi siama hmalak a nih thu a sawi a. He huna hri danna la lo te chu ASHA, Anganwadi Workers leh Health Department-a thawk ten an In-ah kalchilha hri danna hi pek a nih dawn thu a sawi bawk.
Nimin zing-a he beihpui thlakna hawnna hunah hian Serchhip District Medical Suprintendent, Dr. ZD. Lalmuanawma leh District Immunisation Officer, Dr. Lalhlunpuii bakah thawktu dangte an tel bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn