Serchhip Block Congress in Hawla an lawmpui

Serchhip Block Congress Committee chuan Serchhip bialtu MLA hlui, Lal Thanhawla chu Serampore University in Doctor of Divinity a hlan avanga lawmpuina nimin khan an hlan.
Serampore University in Lal Thanhawla hnena Doctor of Divinity a hlan avanga lawmpuina hun nimin-a Aizawl Zarkawt-a a chenna In-a Serchhip Block Congress Committee in an buatsaih ah hian Serchhip Block Congress Committee President, R. Vanlaldula chuan Lal Thanhawla chu kan State in kan chawimawi thiam loh laiin State pawn atangin chawimawina Nopui a rawn pe nia sawiin, huaisen taka ram tana a inpekna zawng zawng avanga he chawimawina hi hlawh chhuak a nih thu a sawi bawk.
He hunah hian Lal Thanhawla chuan Mizoram-a hmasawnna hnathawh tam ber chu Abrahama hnena Pathian thutiam, ‘Nang malsawmna ni ang che’ tih kengtu Congress party thawh a ni tih sawi nawn lehin, Mizo mipuiten kan tlangmi pui Arunachal, Garo leh Khasi te anga in chawimawi leh fak kan thiam ve loh avangin central sawrkar-a Minister leh mi pawimawh kan neih theih loh phah tih chu mithiamte ngaihdan a ni, a ti a. MIMER hming Zoram Medical College tia hming thlak pawi a tih thu leh MIMER chu MBBS zirna atan chauh ruahman ni lova thil zirbingna (Institution) atana tih a ni tih a sawi a, tunah chuan chu chu thil tih theih lovah a chan a hlauhawm ta hle niin a sawi bawk. Serchhip Block Congress Committee in Lal Thanhawla an lawmpuina hun hi an Vice President, Lalthlanthanga Chawngthu chuan kaihruaiin Block Secretary, C. Lalhminghlua'n lawmpuina thuziak (citation) a hlan a ni.

Comments

Chhiar Hlawhte