Truck chesual-ah a neitu VL. Muanawma boral

Serchhip AOC Veng-a VL. Muanawma Motor (Ashok Leyland) chu nizan hmasa khan Tuikum leh Thentlang inkar-ah chesualin kawngthlang ah a tlanliam a, he Motor neitu VL. Muan-awma hi a hmunah boralin nimin khan vuiliam a ni.
Thudawn danin he Motor hian tunkar tir khan Thentlang khuaa Biak In sakna tur Balu leh Iron Rod chu Bagha atangin a rawn phur a, nizan hmasa dar 11:45 vel khan Tuikum leh Then-tlang inkar, Tuikum atanga KM 2 velah chesualin kawngthlang ah hian a tlanliam a, Motor hi meter 90 vel zet kawngthlang ah hian lumin a thlang hi kham a nih avangin Motor pawh hi a chhe hneh hle nia thudawn a ni.
He Motor-ah hian a neitu VL. Muanawma (44) H/o Lalrintluangi (JE PHE), Serchhip AOC Veng bakah a khalhtu Kohbika, Keitum leh Balu Supply-tu, Hmangaihzuali, Chhingchhip Venglai te chuangin Motor neitu hi a hmunah boralin Hmangaihzuali hian hliam na vaklo a tuar a, Motor khalhtu erawhin hliam na a neilo thung. He Motor neitu VL. Muanawma ruang hi Thentlang-ah lain YMA ten a Kuang an siam hnuah nimin zing khan Serchhip rawn thlenpui a ni a, nimin vek khan Postmortem a nih hnuah vuiliam nghal a ni.
He Motor chesualin a phurh bungrua senghawi hna hi nimin khan Thentlang khawtlang chuan thawkin mi 150 vel an thawkchhuak a, Motor in a phurh Iron Rod leh Balu te hi a theih anga thiarchhuakin bungraw dang lakchhuah ngai ang ang te pawh an lachhuak nghal a ni.

Comments

Chhiar Hlawhte