Serchhip Bazar Welfare Association Assembly nei

Serchhip Bazar-a chawhmeh leh thildang zuara eizawng, Serchhip Bazar Welfare Association chuan nimin khan Assembly vawi 36-na neiin hruaitu tur an thlang nghal.
Lalpuithanga Hall, Serchhip Chhim Veng-a Serchhip Bazar Welfare Association Assembly hi an President, C. Lal-siamliani chuan kaihruaiin he huna thu sawitu an Vice President, Laltlanthangi chuan Serchhip Bazar chhunga thil zuara inpho thin te chuan hma an sawn tawh thu sawiin, hmasawnna tur tam tak erawh an la neih thu a sawi a, sumdawng an nih anga dawr nuam tak leh tawngkam hawih-hawm taka thil leitute lo dawngsawng thin tura ngenin, Aia upa zahna an vawng nung zel chu lawmawm a tih thu a sawi a, Faina kawngah nasa zawka hma la leh turin a chah bawk.
Serchhip Bazar Welfare Association Assembly-ah hian Secretary leh Fin. Secretary te Report ngaihthlak niin kum kalta chhunga an member boral mi 2 te sunna hun hman a ni a, kum 10 aia tam an pawl kaihhruai hna lo chelh tawh, C. Lalsiamliani leh Laltlanthangi te chu chawi-mawina hlan an nih bakah kum 70 chunglam he huna kal mi 3 te chawimawina hlan an ni bawk.
Chawhnu lamah Serchhip-III VC kaih-hruaina hnuaiah kum 2020 chhunga an hruaitu tur thlanna neiin President-ah Laltlanthangi, Chhim Veng; Vice President-ah Lalsiamliani, Chhim Veng; Secretary-ah Ramlawmthangi, Veng-chung; Asst. Secretary-ah Zonunsiami, Dinthar Veng; Treasurer-ah Lalrengliani, Dinthar Veng leh Fin. Secretary-ah Lalengzami, Hmar Veng te thlan an ni.

Comments

Chhiar Hlawhte