Latest News

School Education Minister in khaw pathum tlawh

School Education Minister, Lalchhandama Ralte leh Human Resources Development Board Vice Chairman, L. Thangmawia MLA te chuan nimin khan Saichal, Hliappui leh Kawlkulh khua te an tlawh.
Heng khaw hrang hrang an tlawhna a anmahni lo hmuaktute hmaah School Education Minister, Lalchhandama Ralte chuan hun reilote chhungin School Education-ah hmasawnna nasa tak hmuh tur a awm thu sawiin, “Hmun tinah zirtirtu indaihlo thawm hriat tur a awm a, MLA ten an Fund hmangin zirtirtu an ruai sup sup a. Tunah erawh chuan zirtirtu indaihlohna phuhruk nan hian zirtirtu sang chuang lak a lo ni ta a, indaihlohna zualpui phuhruk a lo ni thei ta a ni,” a ti a. Hmasawnna hna chi hrang hrang chu tumkhatah tih vek theih a ni lo tih sawiin, a tahtawlin sawrkarin a thawk zel dawn a ni, a ti a. Khawtlang in zirna ngaih pawimawh hi ram hmasawn nan a pawimawh hle tih pawh sawiin, mi tumruh, taima leh rilru neite chu an hlawhtling thin tih a sawi a. Hmasawnna kawng hrang hrang an thawh ah sawrkar chu thlawp tlat turin mipuite a sawm bawk.
He hunah hian Human Resource Development Board Vice Chairman, L. Thangmawia pawhin sawrkarin kawngpui chhia chu a ngaimawh a, mutmawh hnarmawhah a nei tih sawiin, “Kawngpui siamthat nan hian DPR te pawh central lamah thehluh a ni a, bawhzui nghal zel a ni bawk a. Chung zingah chuan Saitual leh Saichal inkar kawngte pawh a tel a ni,” a ti a. Tunhnaia MR Teacher lakah a theih chin chinah a khaw mi lak an ni te, a thiam thiam an la te chu ram tan a lawmawm hle tih a sawi bawk.

Comments

Popular News (Last 30 Days)