Kuthnathawktute Ni hmang

Agriculture Minister, C. Lalrinsanga chuan nimin khan Hriphaw khua-a 'Kuthnathawktute Ni' hmanna chu khuallian niin a hmanpui.

'Kut-hnathawktute Ni' puala inkhawm ah hian Agriculture Minister chuan Hriphaw khuain cheng nuai 173 chuang Kuhva man an tel thei chu a lawmpui thu sawiin, chu an hlawhtlinna chu an bul tanna nise, tharchhuak tam deuh deuh zel turin duhsakna a hlan a. Kan ram economy siamthatu dik tak leh hmasawnna rahbi min siamsaktu an nih thu a sawi bawk.

Agriculture Minister chuan Kuhva chingtute chu an Kuhva tharchhuahte chu a leitu lam atanga rate siam tir mai lova, inlungrual taka awm a, inrawnkhawm chungin man man zawka an hralh theih nana hmala turin a chah a. Sawrkar pawhin man man zawka an thil tharchhuahte an hralh theih nan hma an lakpui mek thu a sawi bawk a. Nizung chakna hmanga siam Cold Storage chu kuthnathawktute hman tur ruahman mek a nih thu sawiin, Chemical hmanga Kuhva scop siam dante chu mithiamte'n an enchhin mek thu a sawi a. SEDP hmangin ei leh bara kan ram intodelhna turin Potential Area, Mamit District-ah pawh hmalakna tur ngaihtuah mek niin hma lak chhoh mek zel a nih thu a sawi bawk.

Hriphaw khuaa 'Kuthnathawktute Ni' hmanna ah hian Kuthnathawktu hlawhtlingte chawimawi niin kum 2019-a Kuhva thar tam mi 12 leh Coffee thar tam mi 9 bakah Serthlum thar tam mi 2 hnenah chawimawina hlan an ni a. Hei bakah hian an khaw chhunga zirlai tithate chawimawina hlan nghal an ni bawk. Hriphaw khua hian Kum 2019 chhungin cheng Nuai 173 chuang hret Kuhva manah an tel a. Coffee Kg 23000 chuang an thar chhuak bawk a. Nimin a he hun hman hi Hachhek bialtu MLA, Lalrin-dika Ralte chuan khual zahawm niin a hmanpui bawk a ni.