RD Department lawmman lak lawmna leh an hnathawh dan thlirletna neih a ni

Nimin khan Rural Development Department Minister, Lalruatkima hovin Aijal Club Conference Hall-ah Rural Development Department in Ministry of Rural Development hnuaia kum 2019-a RD Scheme hrang hranga hna an thawhthat lawmman 9 lai an lak te lawmna programme leh Department hnathawhte thlirletna leh hmachhawp te sawihona neih a ni.

He hun hman ah hian RD Minister, Lalruatkima chuan kum 2019 chhunga an hnathawh thlirletin hmasawnna tam tak hmuh tur a awm thu leh hlawhtlinna a taka hmuin chumi zarah lawmman 9 lai an lak theih thu a sawi a, hengte hi thawhhona tha an neih vang a ni tih sawiin, heng an lawmman lak hian Department mai bakah Mizoram leh mipuite an chawimawi a ni tih a sawi a. Lawmman la te zinga Village Council 2 an tel chu a bikin lawmawm a tih thu leh Village Council te tel lovin engmah hlawhtlinna an hmu thei lo tih a sawi bawk.

RD Minister chuan RD Department Officer kalkhawmte chu inpekna thar nen kumthar bul tan tura chahin, “Kan hna aia ngaihpawimawh dang kan nei tur a ni lova, he hna hi Pathian in min pek a ni ti a ngaiin Pathian rawngbawlna rilru pu in kan hna te hi inpekna thar nen thingtlang hmasawnna tur ngaihtuah chunga bul tan turin ka chah duh che u a ni,” a ti. Kum kaltaa Department-in sum a hmuh that thu sawiin Minister chuan, heng pawisa te hi ram rotling siam nan leh thingtlang-a mipuite hmasawnna tur atan a nih angin hetiang hawi zawng vek hian District level leh Block level ah te ruahmanna siam nise a duh thu a sawi a. Mizoram-a RD Block 26 zinga Block 20 a tlawh tawh thu tarlangin, Block dang 6 te chu kumin chhung ngeia tlawhchhuah a tum thu leh heng ah te hian mi hlawhtling leh thawk tha te a tlawh chhuah thin thu a sawi a. Award dawngtu zawng zawngte chu lawmpuina thilpek a hlan a ni.

Kum 2019 chhunga Ministry of Rural Development in thingtlang hmasawn nan Scheme hrang hrang an kalpuiah hna thawk tha te thlang chhuakin, nikum December khan Delhi-ah lawmman an sem a. Hetah hian Rural Development Department chuan National Award, Category 6 ah lawmman 9 an dawng a. Chungte chu Shyama Prasad Mukherji Mission Rurban Mission (SSMRM) ah State te leh UT zingah Overall Performance ah 2-na; MGNREGA-ah Implementation of SECURE leh Work Completion ah 1-na ve ve; DISHA ah 3-na; Deen Dayal Antyodaya Yojana – NRLM hnuaia Hmarchhak leh Himalayan State 3 zinga Financial Inclusion ah lawmman 1-na; MGNREGA-a Work Completion-ah Champhai District in 1-na leh Best Performing Gram Panchayat ah Khawpuar in 3-na leh PMAY-G ah hnathawk tha lawmman ‘Individual Awards to Field Functionaries for Excellent Work – Gram Panchayat Sarpanch Award chu Robert Lalramchuana, VCP Khamrang leh Awaas Sahayak Award Zirsangliani, VLAA Serchhip Block in an la bawk a ni.