Damlo thisen mamawhte tumah lo chiai lo turin Health Department in a hriattir

Mizoram sawrkar Health Department chuan thuchhuah siamin Private Hospital-a thisen pek tur Hospital Blood Bank atanga lak chhuah chungchangah Damlo thisen mamawhte tumah lo chi-ai lo turin an hriattir a. Thisen la tur tana phalna leh hriatpuina lakna tur ruahmanna a siam nghal bawk.

Tunlaia Chanchinbu leh Social Media hrang hranga Private Hospital-a thisen pek tur Hospital Blood Bank atanga lak chhuah chungchangah thu leng vel chungchangah Health Department chuan thuchhuah siamin hun rei tak atanga an lo kalpui thin thisen mamawhtu ten Blood Bank atanga direct-a thisen an la chhuak mai thin chu thil himlo leh mihring nunna hial atana thil pawi thei a nih avangin ngun taka an ngaihtuah hnuah kalphung thar hi siam a nih thu leh he kalphung thar hian damlo thisen mamawhtute tan harsatna a siam loh mai bakah a him zawk niin an tarlang a. Hospital-a Blood Transfusion pe thei tur hian Hospital (Govt. leh Private) te chu Drugs and Cosmetic Act 1940 hnuaiah Blood Storage Centre-a pawmpui vek an nih a ngai nia tarlangin, hetiang Blood Storage Centre hi kan State-a Private Hospital tam zawk hian an neih loh avangin inhriatthiamna in tuna kan kalphung ang hian kan kal rih mai zawk niin an tarlang.
Private damdawi In leh hmundanga hman tura thisen mamawh ten Blood Bank atanga thisen an lakchhuah dan tur pawh ruahmanin Civil Hospital Aizawl-ah chuan Office hour hun chhungin Medical Superintendent emaw, Deputy Medical Superintendent atangin phalna leh hriatpuina lak tur a nih laiin Office Hour piah lamah leh Holiday-ah chuan Medical Officer, Casualty Department hnen atangin  lak tur a ni tih an tarlang a. State Referral Hospital, Falkawn-ah chuan Office hour hun chhungin Medical Superintendent emaw, Deputy Medical Superintendent leh Office Hour piah lamah leh Holiday-ah Medical Officer, Casualty Department hnen atangin phalna leh hriatpuina lak tur a ni a. District Hospital-ah chuan Office hour hun chhungin Medical Superintendent leh Office hour piah lamah leh holiday-ah On call Doctor emaw, Senior Most Doctor, staff quarters-a awm hnen atangin phalna leh hriatpuina lak tur a ni tih an tarlang bawk.

Comments

Chhiar Hlawhte