MPC in Grand Revival kumah an puang

MPC Party chuan nimin khan Aizawl-a an Office chu kumin atan hawngin an President, Lalhmangaiha Sailo chuan thu a sawi.

Nimin-a MPC in an Office an hawnna hunah hian an President, Lalhmangaiha Sailo chuan kumin 2020 chu MPC Party chuan Grand Revival kumah an puang tih sawiin, “PRISM Party te nen thawhhona leh inpumkhatna tha lehzual nei turin remchang tha tak mai (big opportunity) a awm thei dawnin a lang a. Beisei pawh a sang hle a ni,” a ti a. Tunhnaia BJP kaihhruai sawrkar laipui chet dan chu an dem thu sawiin, CAB/CAA chungchanga MNF sawrkar hmalak dan pawh a dem thu a sawi bawk.

Mizoram budget chungchang sawiin Lalhmangaiha Sailo chuan, “Mizoram-a kum khat zel sum mamawh (budget) chu cheng vbc. 13000 vel a ni a. Chutih laiin kan state in sum a haichhuah ve chu cheng vbc. 1000 vel chauh a ni a, hei hi a beitham em em a ni. State dang ten GST (chhiah) atang ten revenue an hmu nasa a, a vbc. tel tak meuh an hai luh laiin Mizoram chuan cheng vbc. 21 chauh kan hmu a. Hei hi India rama la lut tlem ber dawttu kan ni a, vuak dup tham pawh a awm lova, kan tlawm duai duai reng ringawt mai a ni,” a ti bawk.